(AP) – President Donald Trump a firma un ordo ehecutivo dialuna unda lo mantene TikTok operativo pa 75 dia, un alivio pa usuarionan di e plataforma di red social aunke preguntanan y dudanan pa cu seguridad nacional ta persisti.
TikTok su compania basa na China ByteDance tabatin e ordo di haya un cumprado na Merca of ser prohibi dia 19 di januari. Trump su ordo ehecutivo por duna ByteDance mas tempo pa haya un cumprado.
“Mi ta kere mi tin un aprecio pa TikTok,” Trump a bisa.
Shou Zi Chew, TikTok su CEO, tabata presente na Trump su inauguracion, sinta cu magnatenan den sector di tecnologia Mericnao.
Trump a genera casi 15 miyon sigui riba TikTok desde cu el a uni e plataforma aña pasa y el a credita e plataforma den yuda su persona atrae votadornan hoben. Sinembargo e 170 miyon usuario no tabatin acceso na TikTok pa mas di 12 ora entre diasabra anochi y diadomingo mainta.
E plataforma a bay offline ora cu e aprobacion a keda aproba pa Congreso y manteni pa Corte supremo di Merca. Despues cu Trump a priminti cu e lo pone un pausa na e prohibicion dialuna, TikTok a restaura acceso pa su usuarionan existente. Google y Apple sinembargo, te ainda no a bolbe pone TikTok riba nan app-store respectivo.
Lidernan di negoshi, legisladornan, profesornan legal y influencernan cu ta genera ganashi riba TikTok ta mirano con Trump ta purba resolve e problema regulatorio, legal, financiero y geopolitico cu su firma.
Con e prohibicion a cuminsa?
TikTok ta permiti e usuarionan crea y mira videonan di forma cortico y a kibra recordnan pa medio di opera cu un algoritmo cu ta duna usuarionan recomendacionnan basa riba nan habito y loke nan ta mira frecuentemente. Sinembargo preocupacionnan tocante su potencial di ta usa como un herment pa Beijing manipula y vigila Mericanonan tin for di antes di Trump su prome presidencia andando.
De 2020, Trump a emiti ordonan ehecutivo cu a prohibi negoshi cu ByteDance y e doñonan di e aplicacion di mensahe WeChat. Cortenan na final a blokia e ordonan, sinembargo menos di un aña atras Congreso a aproba e ley citando e preocupacionnan di seguridd nacional pa prohibi TikTok al menos cu ByteDance bende na un cumprado aproba.
E ley, cual a drenta na vigor diadomingo, ta permiti boet di te hasta 5,000 dollar pa cada usuario di TikTok Mericano contra e app-storenan mas grandi y servicionan di internet manera Oracle cu sigui distribui TikTok na usuarionan di TikTok despues di e deadline pa ByteDance su benta.
Trump riba diadomingo a bisa cu el a puntra TikTok su proveedornan di servicio Mericano sigui sostene e plataforma y aplicacion mientras e ta prepara pa firma un ordo ehecutivo pa stop e prohibicion pa awo.
“E ordo tambe lo confirma cu no tin ningun riesgo pa cualkier compania cu a yuda mantene TikTok live prome cu mi ordo,” Trump a publica riba Truth Social, su red social.
Ki diferencia e benta di TikTok lo por haci
Duda tocante e condicionnan pa un atraso ta existi actualmente mirando cu no tin un posibel cumprando nombra pa confirma cu e benta ta canando.
Sinembargo Alan Rozenshtein, un profesor di ley di Minnesota, a skirbi cu e ley tambe ta empodera e presiente pa dicidi kico ta constitui un “benta cualifica” – cual ta sugeri cu Trump por tin discrecion si bisa ora cu ByteDance cumpli e terminonan di Protecting Americans from Foreign Adversary Controlled Applications Act.
Aunke ByteDance a pasa lunanan ripitiendo cu e no tin interes den un benta, Beijing riba dialuna tambe a firma un posibel alivio riba China su posicion riba TikTok pa permiti cu esaki lo ser bendi y separa for di e compania mayor Chines. China su vice presidente a tene reunionnan cu Vice Presidente JD VAnce y Elon Musk riba diadomingo.
Vocero di Ministerio di Exterior Mao Ning, a bia cu e operacionnan di negoshi y adkisicionnan “mester keda independientemente dicidi pa companianan di acuerdo cu e principionan di mercado.”
“Si ta trata e companianan Chines, China su leynan y regulacionnan tambe mester ser observa,” Mao Ning a comenta.
Te cu awo a pensa cu Beijing no lo permiti e benta di TikTok, cual a bira un simbolo di China su rebeldia den bista di “robo di parti di Merca.” Sinembargo, TikTok ta entre e varios problema cu a trece dilanti den un yamada entre President di China Xi Hinping y Trump diabierna, aunke detayenan no tabata disponibel.
Trump riba dialuna a bisa cu e tabata buscando manera pa Merca yega na un acuerdo di 50% control di TikTok, agregando cu “tur persona rico” a yam’e pa adkiri e plataforma. “Mi ta kere cu Merca mester tin e derecho di haya mita di TikTok y pabien, TikTok tin un bon partner cu por bal te hasta 500 biyon dollar,” Trump a bisa. “E cifranan ta loco, pero e no tin balor” sin un cumprado Mericano.
Otro obstaculonan legal
Senador Tom cotton di Arkansas, den un mensahe publica riba X, a pone den lista un cantidad di agencianan estatal, federal y entidadnan priva, cu por ta dispuesto bay corte pa e prohibicion keda aplica.
“Cualkier compania cu ta anfitriona, distribui, duna servicio of di otro manera ta facilita TikTok cu ta controla pa comunismo por enfrenta biyones di dollar den boet bao ley, y no solamente for di DOJ sino tambe bao leynan di seguridad, demandanan di shareholder y AG estatal,” Cotton a nota.
Apesar di e criticanan intenso y posibel gastonan involucra, e topico di TikTok ta den cierto manera negoshi pa companianan di tecnologia involucra, segun Gus Hurwitz, un profesional legal cu International Center for Law and Economics.
Cua companianan ta dicidiendo si nan tin confiansa den Trump su garantianan?
Tin hopi pregunta tocante e companianan manera Oracle y Akamai Technologies cu ta poderando Tiktok su servernan pa keda online, mientras cu otronan manera Apple y google a haci e aplicacion no disponibel pa usuarionan nobo descarga.
Ningun di e companianan a responde peticion pa comentario.
Mientrastanto, desde dialuna anochi, un buskeda pa TikTok riba app-store ta dirigi na un declaracion online cu ta informa cu “Apple tta obliga sigui e leynan den e hurisdiccion unda e ta opera,” mientras cu Google su app-store ta nota cu descarga pa TikTok “ta den pausa a causa di rekisitonan legal di Merca.”
