Declarando espacio crucial pa defensa nacional, presidente Donald Trump a bisa ayera cu Pentagono a establece US Space Command pa preserva dominio Mericano ‘na e tereno mas halto’.
El a bisa cu Comando Espacial, lidera pa un general di cuater strea di Forsa Aereo, lo ‘sigura cu superioridad Mericano den espacio nunca ta cuestiona ni menasa’.
Pero ainda no tin Forsa Espacial. Forsa Espacial, cual a bira un linea di aplauso confiabel pa Trump durante su eventonan di campaña, ainda mester ricibi aprobacion final di congreso.
E enfoke renoba riba espacio como un dominio militar ta refleha preocupacion tocante e vulnerabilidad di satelite Mericano, tanto militar como comercial, cual ta critico pa interesnan Mericano y potencialmente suceptibel pa interupcion mediante armanan anti- satelite Ruso y Chines.
E rol di e Comando Espacial nobo ta pa conduci operacionnan manera habilita nabegacion basa riba satelite y comunicacion pa tropa y comandantenan den e campo, tambe dunando advertencia di lansamento di misil den exterior. Esey ta diferente di un Forsa Espacial, cual lo ta un servicio militar distingui, manera ehercito, marina, forsa aereo, y warda costa.
Congreso ta mas cerca di aproba e creacion di un Forsa Espacial a pesar di skepticismo di algun legislado di ambos partido. E propuestanan ta diferente den algun punto, y un esfuerso pa reconcilia nan lo cuminsa ora congreso bolbe di su reces di augustus.
Mark Esper, secretario di defensa, a posiciona su mes como un sostenedo fuerte di crea tanto un Forsa Espacial como un comando dedica na espacio. “Pa sigura proteccion di interesnan Mericano den espacio, nos mester aplica e enfoke, energia y recursonan necesario, y esey ta locual e Comando Espacial lo haci”, Esper a bisa.
Kaitlyn Johson, un experto di defensa espacial na Centro pa Estudionan Strategico y Internacional, a bisa cu e ta considera probabel, pero no sigur, cu congreso lo aproba un Forsa Espacial den e ley di defensa 2020.
Trump kier pa Forsa Espacial ta ‘separa pero igual’ na otro servicionan, pero ta spera cu e lo ta parti di Forsa Aereo, similar na con Marinier ta parti di Navy.
