(AP) — Ex-presidente Mericano, Donald Trump a bolbe X, e red social anteriormente conoci como Twitter, lansando su prome mensahe den mas cu dos aña y mey tiki despues cu el a entrega su mes na un warda di polis na Atlanta pa cargonan cu el a conspira pa reverti su perdida den eleccion.
El a post su potret policial, of ‘mug shot’, cu e palabranan “Interferencia den eleccion. Nunca entrega!” hunto cu un link na su website cu ta dirigi na un pagina pa recauda fondo.
Tabata e prome post di Trump desde 8 di januari 2021, tempo cu Twitter a suspende su cuenta indefinidamente citando miedo cu e lo incita violencia nacional despues di e accion na edificio di Capitol Mericano. Su cuenta a keda rehabilita na november ultimo despues cu Elon Musk a tuma over e compania, pero Trump no a tweet, insistiendo cu e tabata mas feliz riba su propio Truth Social, cual el a lansa durante e suspension.
Trump, actualmente e front-runner pa nominacion presidencial Republicano, tabatin lunas ta bisa cu e tabatin plan pa bolbe na e plataforma “na e momento corecto,” segun un persona familiar cu su comentarionan kende no tabatin autorisacion pa revela combersacionnan priva y a papia di forma anonimo. Post di Trump a yega mientras e tabata abordo di su avion priva, bulando back for di Atlanta na su cas di berano na New Jersey diahuebs laat.
No tabata inmediatamente cla si e post tabata un excepcion of si e tin intencion pa continua post regularmente riba e website. El a post e mesun mensahe riba Truth Social anteriormente, y a continua promove e plataforma aki. “Mi ta stima Truth Social. E ta mi hogar!” el a skirbi.
Sinembargo, e mensahe a marca e regreso di Trump na un di su megafononan di mas importante – un cu el a usa pa domina su rivalnan den primaria di 2016 y pa comanda e ciclonan noticiero pa añas. Trump hopi biaha tabata asombra con lihe su palabranan lo biaha di su cuenta na noticieronan riba cable bao di e banner “Breaking News.”
E post nobo a yega un dia despues cu Trump no a asisti na e prome debate primario Republicano, scogiendo na su lugar pa graba un entrevista cu ex-anfitrion di Fox News, Tucker Carlson cu a post riba X como contra-programa na comienso di e debate.
E regreso na X cu loke tabata, efectivamente, un accion pa recauda fondo, tambe ta refleha con hopi placa e campaña di Trump ta gastando riba abogadonan mientras e ta bataya cargonan criminal den cuatro hurisdiccion. Operacion politico di Trump a drenta e segundo mita di aña den un situacion financiero precario cu su cuenta bancario faltando decenas di miyones di dollar cu a dirigi na e defensa di e ex-presidente y su aliadonan.
Trump tin 86.6 miyon siguidor riba loke awo ta X, eclipsando su rivalnan den campaña 2024.
Pero e plataforma a pasa den cambionan significante desde cu Trump a bay, incluyendo cu Musk a cambia su nomber.
Pero Trump a keda cu Truth Social, e plataforma similar na Twitter cu el a lansa despues di su suspension di Twitter y Facebook pa post un fluho diario di comentario, anuncio y re-post. Esaki a inclui usa e plataforma pa revela noticia di su acusacionnan y plan pa entrega mientras e ta enfrenta un lista cada bes mas grandi di problema legal.
Como parti di su acuerdo cu Digital World Acquisition Corp. pa haci Truth Social publico, Trump a bay di acuerdo – pa e no lo competi contra su propio compania – cu esaki lo bira “e prome canal” pa “tur y cualkier comunicacion riba rednan social y postnan di su perfil personal,” segun documentonan entrega na U.S. Securities and Exchange Commission. Eskai ta inclui un clausula di exclusividad den cual e ex-presidente ta “generalmente obliga pa haci cualkier post di rednan social riba Truth Social y no por haci e mesun post riba otro red social pa seis ora,” pa un periodo di 18 luna, cuminsando 22 di december 2021. E periodo aki a termina na juni.
