(AP)—Presidente Donald Trump a bisa ayera cu e lo impone tarifanan di 25% riba importacion for di Canada y Mexico y tarifanan di 10% riba productonan for di China efectivo awe, cual ta stimula e menasa di un aumento den prijs pa consumidornan Mericano.
Trump tin tempo ta menasando tarifa pa sigura miho cooperacion for di e paisnan pa stop inmigracion ilegal y e trafico di kimica usa pa fentanilo, pero el a priminti tambe pa usa tarifa pa aumenta fabricacion domestico y aumenta entrada pa e gobierno federal.
“Cuminsando mañan, e tarifanan ey lo ta implementa,” e secretaria di prensa di e Cas Blanco, Karoline Leavitt, a conta reporteronan ayera. “Esaki ta promesanan cu a haci y promesanan manteni pa e presidente.” Papiando cu reporteronan den e Oficina Oval mas despues, Trump a bisa cu no tin nada cu e pais por haci pa preveni e implementacion di e tarifanan awe.
E tarifanan aki ta carga riesgonan politico y economico pa Trump, ken tin solamente dos siman den e oficina presidencial. Hopi votado a sostene e Republicano riba e promesa cu e lo reduci inflacion, pero e posibilidad di tarifa por causa un aumento den prijs di productonan y posiblemente stroba e sectornan di energia, auto, carpinteria y agricultura.
Trump a bisa cu e ta pensando si e suministra un excepcion pa importacion di azeta for di Canada y Mexico. El a bisa diabierna cu e ta considerando un tarifa mas abao riba azeta, pero no ta claro si esaki lo tuma efecto ora e firma e orden awe.
Merca a importa casi 4.6 miyon bari di azeta diariamente for di Canada na october y 536,000 bari for di Mexico, segun e Administracion di Information Energetico. Produccion diario na Merca durante e luna ey ta conta pa un promedio di 13.5 miyon bari pa dia.
Trump a bisa anteriormente cu un tarifa di 10% riba importacion for di China lo ta prome riba otro tarifa riba productonan for di e pais.
“Nos lo anticipa pa tur pais tuma represalia,” segun Wendy Cutler, un ex-negociador federal di comercio. China a responde agresivamente na e tarifanan cu Trump a impone riba productonan Chines durante su prome termino, implementando impuestonan di represalia riba exportacionnan agricultural Mericano riba sostenedornan di e presidente den e parti rural di Merca.
Ambos Canada y Mexico a bisa cu nan a prepara e opcion di tarifanan represalia si ta necesario, cual na su turno por causa un conflicto comercial cu analisisnan economico a bisa por trece daño na crecemento y acelera inflacion mas ainda.
Prome minister Canades, Justin Trudeau, a bisa ayera cu Canada ta cla cu un respuesta si Trump implementa e tarifanan, pero e no a duna mas detaye tocante esaki. Trudeau a bisa cu e tarifanan lo tin “consecuencianan desastroso” pa Merca, poniendo trabaonan di Mericanonan den peliger y causando un aumento den prijsnan. Trudeau ta reitera cu menos cu 1% di e crusamentonan ilegal y fentanilo den Merca ta bin for di Canada.
Presidente Mexicano, Claudia Sheinbaum, a bisa ayera cu Mexico a mantene un dialogo cu e equipo di Trump prome cu el a regresa na e Cas Blanco, pero el a enfatisa cu Mexico tin un “Plan A, Plan B, Plan C pa loke e gobierno Mericano dicidi.”
“Awo ta hopi importante pa Mexicanonan sa cu nos semper ta bay defende e dignidad di nos pueblo, nos semper ta bay defende e respet di nos soberania y un dialogo entre igualnan, manera nos semper a bisa, sin subordinacion,” Sheinbaum a remarca.
Liu Pengyu, un vocero pa e embahada Chines na Washington, a bisa cu e dos pais mester resolve nan diferencia via dialogo y consulta. “No tin ningun ganado den e guera di comercio of guera di tarifa, cual no ta sirbi ningun manda di mundo,” Liu a bisa den un declaracion. “Apesar di e diferencianan, nos dos pais ta comparti interesnan comun y espacio pa cooperacion.”
Un estudio e luna aki pa Warwick McKibbin y Marcus Noland di e Peterson Insistitute for International Economics a conclui cu e tarifanan di 25% riba Canada y Mexico y tarifanan di 10% riba China “lo trece daño na tur economia envolvi, incluyendo Merca.”
