Presidente Mericano, Donald Trump a bisa diasabra cu el a duna su ‘bendicion’ na un acuerdo proponi cu lo mira e app di video popular, TikTok, asocia cu Oracle y Walmart y forma un compania Mericano.

Trump a tuma accion contra TikTok, propiedad Chines, pa motibo di preocupacionnan tocante seguridad nacional y privacidad, den e punto critico mas recien di e tensionnan escalando entre Washington y Beijing. E sosten di e presidente pa un acuerdo ta yega net un dia despues cu Departamento di Comercio a anuncia restriccionnan, cu si wordo implementa, por eventualmente hacie casi impostibel pa e fanaticonan jong di TikTok usa e app.

Trump a bisa cu si completa e acuerdo lo crea un compania nobo, probablemente basa na Texas. “Mi a duna mi bendicion pa e acuerdo”, el a bisa. “Si nan logra, esey ta tremendo. Si nan no logra, esey ta okay tambe.”

Trump a bisa cu e compania nobo lo contrata al menos 25mil persona y haci un contribucion di $5 miyon na un fondo dedica na educacion pa Mericanonan. “Esey ta e contribucion cu mi a pidi”, el a bisa.

TikTok a bisa cu Oracle y Walmart lo adkiri un accion cumulativo di 20% den e compania nobo den un ronda di financiamento cu lo tuma luga prome cu un oferta publico di stick, cual Walmart a bisa por sucede den proximo aña. Accion di Oracle lo ta 12.5% y di Walmart 7.5%, e companianan a bisa den declaracionnan separa.

E acuerdo lo haci Oracle responsabel pa tene tur datonan di usuarionan Mericano di TikTok, y sigura sistemanan di computer, pa sigura cu ta satisface rekisitonan di seguridad nacional Mericano. Walmart a bisa cu lo provee su servicionan di e-commerce, fulfillment, y pago entre otro, na e compania nobo.

Trump tabata exigiendo pa bende operacion Mericano di TikTok na un compania Mericano, de lo contrario, lo shut down e operacion. Ademas tambe ta enfoca riba otro compania Chines, WeChat.

E administracion ta bisa cu e data di usuario colecta pa e dos appnan por ser comparti cu gobierno Chines. Diasabra, Trump a bisa cu e TikTok basa na Merca ‘no lo tin nada di haci cu China’. TikTok ta bisa cu tin 100 miyon usuario Mericano.

Anteriormente diasabra, usuarionan di WeChat a pidi un hues Mericano pa blokea accion di gobierno prohibiendo e app riba tienda di app na Merca. WeChat ta un app completo cu mensahe, red social y otro hermentnan di comunicacion. Gobierno Mericano a argumenta cu no ta restringiendo libertad di expresion pasobra usuarionan di WeChat ainda ‘ta liber pa papia riba plataformanan alternativo cu no ta un menasa pa seguridad nacional’.

Hues magistrado Laurel Beeler a puntra abogadonan di gobierno y usuarionan di WeChat si e prohibicionnan lo manca WeChat asina cu ora bati di diadoming anochi pa dialuna mainta sin resolucion. Un abogado di gobierno a bisa cu probablemente lo conduci na un ‘degradacion’ di WeChat durante algun tempo.

Hues Beeler no a duna un veredicto inmediato.

WeChat tin miyones di usuario Mericano cu ta depende riba e app pa keda den contacto y conduci negoshi cu hende y companianan na China y rond mundo. Den documentonan di corte, e fundado di Asociacion di Salud Mental pa Comunidadnan Chines, kende ta un ciudadano Mericano na California, a bisa cu e herment principal di e grupo pa yega y provee servicionnan na Chines-Mericanonan ta WeChat. “Ya cu hopi miembro di comunidad Chines no ta papia bon Ingles, WeChat ta e unico herment online riba cual nan ta depende”, Elaine Peng a bisa.

E tacticanan agresivo di administracion di Trump ta parti di su intento mas recien pa contraresta e influencia di China, un superpoder economico den ascenso. Desde cu a tuma su cargo na 2017, Trump a tene un guera comercial cu China, a blokea fusionnan involucrando companianan Chines, y a horca negoshi di companianan Chines manera Huawei.

Mientras tanto, hackernan cu sosten di China a ser culpa pa violacionnan di data den basenan di dato federal y e agencia di credito Equifax, y gobierno Chines estrictamente ta limita kico companianan tecnologico Mericano por haci na China.

Ministerio di comercio di China a condena e accionnan Mericano, urgiendo pa stop loke e ta yama como comportamento di termento. Tambe a bisa cu China por tuma ‘medidanan necesario’ pa protege companianan Chines.

Departamento di Tesoro Mericano a bisa diasabra cu e acuerdo di TikTok ainda mester keda firma cu Oracle y Walmart, y ainda mester pa su documento- y condicionnan keda aproba pa e Comite riba Inversion Stranhero na Merca. Esey, claro, ta duna espacio pa mas rollercoaster di emocion pa usuarionan di TikTok.