NEW YORK – Donald Trump ta ganando e eleccion cu 264 voto electoral (48.2%) contra 215 voto (47.1%) pa Hillary Clinton, yegando hopi cerca di e 270 voto necesario pa bira e presidente nobo di Merca. Clinton a indica caba cu lo no duna un discurso momento cu e resultado final ta conoci.
E resultado ta un sorpresa na Merca tambe unda cu te na ultimo mayoria di e polls tabata indica Clinton como ganado.
Sinembargo for di comienso caba cierto estadonan manera Florida y North Carolina, e votamento aki tabata mustra den un victoria pa Trump. Den social media por a mira for di trempan caba comentarionan di Arubianonan cu no por a kere kico tabata pasando. Manera Bon Dia Aruba a publica riba su website Bon Dia 24 hopi Arubianonan cu nos a entrevista a indica cu nan ta pro Clinton.
Dado momento e resultatonan pa Clinton tabata mustra di bay den un miho direccion atrobe. Pero no pa mucho tempo ora a anuncia cu e estadonan crucial di Florida, North Carolina y Ohio realmente a bay pa Trump. Remarcabel pa motibo cu Trump den su campaña electoral a expresa su mes hopi biaha den un forma discriminativo den direccion di Latinonan. Pero a resulto cu na Florida no mucho Latinonan a vota (18%). Y e perdida di North Carolina tabata un sla duro pa Clinton como cu el a campaña te na ultimo den e estado aki.
Otro resultatonan remarcabel tabata e victoria di Trump den estadonan unda e partido Democratico semper tabata domina manera Michigan y Wisconsin. Y finalmente e sla duro a bin banda di 3 or madurga ora Tromp tambe a gana Pennsylvania.
House y Senate
E partido Republicano tambe a logra di gana mayoria den House of Representatives cu 231 asiento y pa e partido Democratico 169 asiento momento cu e edicion aki a cera. Pa un mayoria mester 218 asiento
Ni den e Senate e partido Democratico por a logra un mayoria manera hopi a anticipa. E asientanan ta hopi cerca di otro: 48 pa Republicanonan y 46 pa e Democraticonan, cu ainda 6 asiento sin resultado.
Peferencia di gabinete Eman
Bon Dia Aruba a puntra prome minster Mike Eman ayera riba e preferencia di su gabinete pa cu candidato bira presidente. “Semper nos a nota cu gobierno Mericano sea cu e gobernacion su signatura ta partido Democrata sea partido Republicano, un continuidad di amistad. Nos no ta kere cu esey lo haci un diferencia. Naturalmente nos tur den nos curason nos tin nos faborito pero no ta ta algo cu nos ta comunica pafo. Pasobra ta importante pa bo tene un relacion cu cualkier gobierno cu ta na mando den un otro pais. Bo por tin bo pensamentonan riba esunnan cu bo ta faborece cu ta cuadra mas cu bo idealnan. Pero esey ta mas den e esfera personal. Den esfera di gobernacion, cua gobernacion ta sinta den gobierno na Merca, nos por traha bon cu ne. Y nos no ta spera otro despues di e eleccion.”
