Durante su bishita na e pais, Trump a papia cu Prome Ministro Theresa May riba su logronan mirando cu e lo baha for di su encargo pronto. E presidente Mericano ta spera cu despues cu Inglatera caba cu Brexit, Merca y Inglatera por bin na un acuerdo comercial ‘fenomenal’.
Prome cu esey, e presidente Mericano a atacha e prome minister di Inglatera pa su incapacidad pa sigura un deal pa Brexit cu Union Europeo. E ta plania di renuncia diabierna awo como hefe di partido, pero lo sigui manera prome ministro te ora su sucesor wordo scogi.
Lo bira responsabilidad di e siguiente prome ministro pa negosha un Brexit solido. May ta spera cu su sucesor lo por haci esaki, mirando cu e ta haya esey ta e miho opcion pa ‘Inglatera su futuro’. Trump a sugeri cu un tiki humor pa May ‘warda un rato’ te cu Merca y Inglatera bin cu un acuerdo comercial nobo, na cual May y su conseheronan a hari.
E dos lider a combersa cordialmente durante un recorido di oficina di prome ministro, May a señala un copia di declaracion di independencia di Merca. Tambe a planea un conferencia hunto.
Trump a bisa den un entrevista cu ‘Sunday Times’, prome cu yega Inglatera cu e mester hala leu di combersacion y nenga pa paga un recibo di divorcio di 39.000.000 miyon di libra si no tin miho condicion cu Union Europeo.
E presidente Mericano a expresa su apoyo pa un ‘Brexit duro’, pues sin negociacion cu Union Europeo, cual segun expertonan por tin un impacto desvastador pa economia di Inglatera. Anteriormente e posicion di e White House tabata pa percura pa e salida ta menos doloroso cu ta posibel. Otronan na Inglatera ta presionando pa un di dos referendum cu por mantene intacto e lasonan cu Union Europeo, cu enfoke riba negoshi y comercio.
Trump lo uza proximo dia dos dia pa conmemoracion di 75 aniversario di 6 juni di 1944. Dia significativo cu lo wak mayoria di veterano di bataya. E evento ta cuminsa na Portsmouth, Inglatera unda cu invasion a tuma luga, despues lo move pa canal di Francia unda forsa aliado a cuminsa captura Europa Occidental di nazi.
