(AP) — Ex-presidente Mericano, Donald Trump ta enfrentando varios cargo di falsifica documento di negoshi, incluyendo al menos un delito, den e acusacion entrega pa un gran hurado di Manhattan, segun dos persona familiar cu e asunto a bisa AP ayera.
Diamars ta bay arest’e y proces’e formalmente den su caso di pago pa silencio, poniendo e escena pa e momento historico y shockeante den cual ta forsa un ex-presidente para dilanti un hues pa scucha e cargonan criminal den su contra.
Maske e acusacion tabata seya y e cargonan specifico no tabata conoci inmediatamente, detayenan a ser confirma pa hende cu a papia den condicion anonimo pa discuti informacion cu no ta publico ainda.
Ora Trump entrega su mes, ta bay proces’e mas tanto manera cualkier otro persona enfrentando cargo, sacando potret, tumando su fingerprint y tur cos. Pero no ta spera cu ta bay pon’e na boei; e ta bay tin proteccion di Servicio Secreto y casi sigur ta bay sali e mesun dia.
Mientras tanto, team legal di Trump a prepara su defensa mientras e fiscal a defende e investigacion di e gran hurado cu a impulsa e asunto pa bay den huicio. Republicanonan congresional como tambe Trump mes ta bisa cu e asunto tin motivacion politico.
E caso ta lansando Merca den teritorio desconoci, cu Trump como e prome ex-presidente den historia pa enfrenta un enhuiciamento. Y e implicacionnan politico por ta enorme prome cu eleccion presidencial di proximo aña.
