(AP) – Donald Trump a sinta solemne den un corte na New York ayera mientras fiscalnan a acus’e cu 34 cargo di delito di falsifica documentonan di negoshi den un investigacion di placa pa silencio. E prome ex-presidente pa keda acusa di crimen a declara inocencia di tur cargo.
Trump a nenga cu a haci algo fout, ripitidamente a ataca e investigacion, a bisa cu e acusacion ta un “persecucion politico” y a pronostica cu esaki lo daña e Democratanan na 2024. Abogadonan di Trump a bisa cu e ex-presidente Republicano “no a comete ningun crimen” y cu nan ta bay “bringa vigorosamente e persecucion politico aki den corte.”
Riba diamars a procesa Trump. Prome cu computer, informacion di tur sospechoso criminal lo wordo skirbi den un buki grandi den man di oficialnan di corte. Awo tur cos ta computarisa, pero e proceso ta en gran parti mescos. Oficialnan di corte a tuma nomber completo, edad, fecha di nascemento, largura y peso di e acusado. Nan a check pa cualkier orden di aresto pendiente. Tabata spera cu nan a tuma fingerprint di Trump, pero no ta kere cu a saca su potret.
Na New York, e proceso aki usualmente ta dura dos ora, pero por ta hasta cuatro. Pero no tabatin otro persona siendo procesa na momento cu Trump a yega, dus el a bay lihe. Despues el a presenta dilanti hues.
Na e audiencia, fiscal a expresa preocupacion tocante loke nan a bisa tabata post iresponsable riba rednan social, cual nan a bisa a enfoca riba hende den e caso, incluyendo testigonan di gran hurado y fiscal Alvin Bragg. Specificamente nan a punta riba post cu Trump a haci advertiendo di e “potencial morto y destruccion” si e keda acusa. E hues a bisa cu no ta impone un orden di silencio na e momento aki, pero a pidi ambos banda pa no haci comentario of participa den comentario cu por conduci na disturbio civil.
Trump a papia brevemente. El a bisa e hues cu e ta declarando “no culpable” pa 34 cargo delincuente di falsifica documentonan di negoshi, y cu a inform’e di su derechonan. Trump a keda mas tanto keto, y a mira su dilanti durante e procedura cu a dura tiki mas cu un ora.
Abogado di Trump, Todd Blanche a bisa durante e audiencia: “E ta absolutamente frustra, disgusta y ta kere cu tin un gran inhusticia tumando lugar den e corte aki awe.”
Tecnicamente, Trump a ser aresta. Ora ta tuma fingerprint y procesa un persona, ta considera e persona ey di ta bao aresto y den custodia. Pero pa Trump, no tabata mustra manera den pelicula of den show di television “Law & Order.” No a pon’e na boei y e no a sinta den un cel. Esaki en parti pasobra a laga parti di e corte bashi pa su procesamento, y pasobra Trump ta un ex-presidente cu proteccion di Servicio Secreto. No tur acusado ta poni den boei prome cu presenta dilanti un hues, maske algun si.
Trump a cana sali for di e corte. E no a bisa nada, ignorando reporteronan.
Trump ta programa pa bolbe corte na december. Su abogadonan a pidi pa excus’e di atende e audiencia personalmente pa motibo di e medidanan di seguridad extraordinario.
