Presidente Donald Trump a defende su biahe pa Puerto Rico, devasta pa horcan Maria, y a bolbe critica “e noticianan falso” y e medionan di comunicacion, cu e ta culpa di e criticanan ricibi pa su respuesta na e desastre na e isla.
“Un gran dia ayera na Puerto Rico. Aunke parti di e cobertura di medionan ta falso, e mayoria a mustra gran calor humano y amistad,” Trump a bisa riba Twitter. Den su bishita na e isla e tabata testigo di e devastacion causa algun siman pasa pa horcan Maria.
“Tanto noticia falso awe. No ta importa loke mi haci o bisa, nan lo no skirbi ni bisa e berdad. E medionan falso ta for di control,” Trump a añadi riba Twitter.
Trump no por a keda sin causa polemica durante su bishita na Puerto Rico y a yega na considera e desastre menos importante, pa e cantidad abao di victima mortal y pasobra na su huicio, no ta trata di “un catastrofe real.”
E biahe di e presidente tabata envolvi den polemica caba prome cu el a keda programa, pasobra, diferente cu e situacion na Houston, unda el a yega un par di dia despues di e catastrofe natural di horcan Harvey, Trump a tarda mas di dos siman pa yega Puerto Rico.
E cantidad di fayecido a consecuencia di e horcan a subi te na 34 y e daño material ta subi te na 90,000 miyon dollar, segun cifra ofreci pa gobernador di Puerto Rico, Ricardo Rosselló.
