Den un comunicado cu ministerio di Husticia a manda pa medionan local, a wordo informa pa comunidad cu Richard Kramers a keda encarga cu mando diario di Guarda Nos Costa.
Minister di Husticia, Andin Bikker a apunta onder-inspecteur Richard Kramers cu e encargo di maneho diario di Guarda nos Costa despues cu Trudy Hassell a participa ayera na minister Bikker cu e no ta disponibel mas pa sigui cu e encargo diario di Guarda nos Costa.
Di mesun manera, nan a menciona cu Hassell, cu den pasado tabata na mando di e organisacion, a bolbe dirigi esaki desde juli 2018, caminda a logra entre otro pa e organisacion bira un dienst riba su mes na 2019; a zorg pa haya material di trabou necesario pa personal cu tabata pendiente pa varios aña; tambe a tene controlnan severo y a zorg pa cuminsa adresa e falta di localidad y infrastructura adecua pa por retene personanan cu no tin status legal bou di e Landsverordening Toelating en Uitzetting.
E ciere di fronteranan a base di e pandemia di coronavirus, e hecho cu mas persona sin status legal tabata wordo detecta den cuadro di controlnan entre otro di e shelter in place y toque de queda, den combinacion cu e falta di localidad adecua pa por retene personan cu no tin status legal, a pone cu e ultimo lunanan e circunstancianan na Guarda nos Costa a bira uno hopi tenso.
Entre otro mester a zorg pa urgentemente cuminsa adresa e falta di localidad y infrastructura adecua y reforsa e vigilancia na GNC cu cooperacion di KPA y CEA, cu tabatin varios incidentenan di huida. Tambe tabatin varios casonan di menasa contra di e personal di WNC door di reclusonan cu a wordo traspasa for di KIA despues di a sinta nan castigo penal.
Ademas, den comunicado Bikker a gradici Hassell pa e trabou cu el a haci desde 2018 bou e circunstancianan dificil aki door di e situacion dificil di e pais bisiña Venezuela y cu ultimo tempo a trece retonan sin precedente debi na pandemia.
Di su banda, Kramers a presencia varios encuentro cu minister Bikker, CEA y personal di WNC cu hunto cu su experiencia y estudio nan a sigura cu ta califica pa sigui cu e trabou cu Hassell a laga.
