Prome Minister Justin Trudeau su campaña a move pa bira un scandal creciente, ora cu un potret di 2001 cu cara pinta bruin y disfraz a ser conoci, hunto cu 2 otro incidente.
Cu solamente un luna pa eleccion, el a pidi dispensa y pa Canada pordon’e. Time Magazine a publica e potret, informando cu ta di un buki di West Point Grey Academy, un scol priva na British Columbia, unda cu Trudeau tabata traha como maestro prome cu el a drenta politica.
Den e potret ta mira Trudeau, di 29 aña di edad, cu makeup na su cara, nek y su man. “Mi ta rabia cu mi mes, desapunta”, el a bisa e reporteronan. E ta e politico mas recien pa drenta den un situacion di ofensa racial pa potret y actonan den su hubentud.
Sinembargo, Trudeau a bisa cu no ta prome biaha el a comete e ofensa. “Mi mester tabata sa di e tempo ey, pero toch asina mi a haci’e y mi ta profundamente sorry. Mi ta pidi henter comunidad di Canada pa pordona mi pa locual mi a haci, y mi no mester a haci’e. Mi ta tuma responsabilidad. E tabata algo dom pa haci”, el a expresa.
Trudeau ta campeon den diversidad, multiculturalismo y asuntonan di migracion. El a wordo admira pa liberal rond di mundo pa su politica den era di Trump, den cual Canada a acepta mas refugiado cu Merca. Su gobierno liberal ta defende fuertemente pa comercio liber y legalisacion di cannabis.
Pero Trudeau ya caba tabata vulnerabel pa un scandal politico anteriormente e aña aki, ora su ex- fiscal general a bisa cu el a presion’e pa stop enhuiciamento di un compania di Quebec. Trudeau a bisa cu e tabata defendiendo trabou, pero e scandal a conduci na renuncia y caida di su rango di aprobacion.
E furor por trece mas problema, awo cu competencia serio di lider conservativo Andrew Scheer den eleccion dia 21 di october. Scheer a bisa cu ‘brownface, blackface’ tabata racismo na 2001 y na racismo na 2019. “Locual pueblo a wak ta un persona cu falta di huicio di integridad y un hende cu no ta den condicion pa goberna e pais aki”, Scheer a bisa.
