Bon Dia a tuma nota ultimo tempo cu algun trucknan di chica pos ta keda bay e dam di Noord pa haci nan tuberia limpi. Nos a tuma contacto cu instancianan concerni kende no a duna nos mucho informacion, pero a confirma cu esaki ta contra di ley.
Bon Dia a acerca City Inspector pa un reaccion riba trucknan di chica pos cu aparentemente ta uza dam pa haci nan tuberianan limpi, y/of keda basha awa di pos den nan. Recientemente Bon Dia mes a tuma nota di uno na e dam di Noord. “Si, esey ta pasa anto e trucknan ta hopi fout bezig. Di nos nunca nan lo haya of nan a haya permiso pa haci tal”, Marlon Pieters di City Inspector ta bisa. E ta agrega cu City Inspector no tin wowo suficiente pa yen di cos cu ta pasando den nos medio ambiente, anto referi Bon Dia na Directie Natuur en Milieu Aruba.
Kibrando ley
Director di Directie Natuur en Milieu Gisbert Boekhoudt a confirma na Bon Dia cu esaki en berdad ta prohibi, segun articulo 16 di politie verordening. Nos a sigui puntra riba sancion, comunicacion cu e companianan di truck aki y tambe con ta haci na controla e tipo di actonan aki contra nos medio ambiente. Mas cu esaki e director no por a bisa, referiendo nos na minister encarga cu medio ambiente. Esaki ta pasobra manera nos a yega di trece caba dilanti, e departamento no ta permiti pa papia cu prensa mas.
Salud Publico
Aña pasa Departamento di Salud Publico a emiti un comunicado den november 2016 informando cu damnan di Noord y Tanki Flip tabata contamina. Esaki tabata netamente den e temporada di awasero y nan a pidi tur hende pa no haci uzo di e awa, ni tampoco basha awa di pos den e dam. Nos lo comunica cu Departamento di Salud Publico como tambe companianan di chica pos pa un reaccion riba e tema.
