Serlimar: ‘Nos lo spera rapport di polis y haci un investigacion interno pa percura pa siguridad’

Dialuna mainta na e t-weg di Cura Cabay pa bay Brasil altura di Wendy’s a sosode un accidente unda un truck di serlimar biniendo for di nort no a para y dal den un auto. Vocero di Serlimar a duna un reaccion riba e suceso aki.

Tabatin 2 truck di Serlimar envolvi cu e accidente, di cual 1 tabata staciona na e t-weg pa bay Brasil y aki e truck cu no a para a dal den e hyundai accent y kentel riba esaki. E auto a keda memey di e trucknan. E personanan a sali levemente herida y a scapa di un desgracia serio. Cu takelwagen pisa a logra pone e truck bek riba su wielnan y asina por a habri e caminda bek.

Vocero di Serlimar Lionel Croes a reacciona na e suceso den un relato: “Serlimar ta un compania cu semper ta pone siguridad durante maneho di desperdicio como prioridad. No ta conoci ainda kico tabata e motibo di e incidente, pero ya caba Serlimar ta haci su investigacion y na mes momento lo warda rapport di Polis prome cu saca un conclusion concreto di kico realmente a sosode”.

‘Serlimar ta lamenta e sucedido di accidente na Cura Cabay y ta tuma e incidente aki hopi na serio’, sr. Croes ta enfatisa. E vocero a amplia cu Serlimar tin un procedura importante di siguridad cu ta tuma luga na momento cu tur truck sali pa nan ruta. Segun sr. Croes, tambe cada truck ta cumpli cu sistemanan di siguridad hopi halto unda cu si tin cualkier fayo cu e truck, e lo duna cualkier indicacion inmediatamente.

“Investigacion ta sumamente importante y lo mester haci esaki debidamente conhuntamente cu Polis di trafico. Cualkier resultado cu wordo demostra pa medio di investigacion, Serlimar lo tuma tur paso necesario pa cu esaki pa asina continua garantisa seguridad na tur momento.”

Sr. Croes a splica cu internamente Serlimar lo tuma pasonan di precaucion pa asina tur trahadonan continua aplica siguridad durante trabou na tur momento, como tambe den trafico y maneho di trucknan di sushi. “Serlimar ta desea pronto recuperacion na e heridonan di e incidente. Tambe nos ta spera cu e tipo di incidente aki no bolbe ripiti”, sr. Croes a finalisa.

Serlimar ta pidi si tin cualkier testigo, pa por fabor tuma contacto cu Serlimar na 524.5080.