Comunidad di Aruba mester ta prepara pa e efectonan di un tormenta tropical Bret cu ta biniendo for di Trinidad y cu lo pasa den vecindario di e islanan ABC (Aruba, Bonaire y Corsou).
E tormenta por tin un impacto di awa y biento pa Aruba for di mañan diamars den oranan di anochi laat. Pa diaranson –segun pronostico di Departamento Meteorologico Aruba (DMA)- e lo ta net panort di nos isla. E modelo atmosferico ta mustra cu unabes e pasa e islanan ABC, e lo ta perdiendo forsa.
Premier di Aruba, Mike Eman hunto cu director di DMA Mark Oduber a anuncia cu lo monitor e comportacion di e tormenta aki pa wak si tin cambio den su desaroyo. Nan lo mantene nos comunidad informa debidamente pa evita cu e fenomeno aki lo por tin un impacto pa nos isla, particularmente e area di Palm Beach y Madiki cu tabata esun cu mas a resulta afecta den e ultimo tormenta pisa cu nos a confronta aña pasa. E mandatario a sugeri pa e articulonan cu por sufri daño pone na un nivel un poco mas halto.
Sinembargo mientras cu na Aruba tabata basta prudente pa bati code oraño, Meteo Corsou y gobierno di Venezuela a bati code oraño ayera mes caba. Te hasta e ministro di Poder Popular pa Eco-socialismo y Awa, Ramón Velásquez di Venezuela a bati e code oraño ayera tempran cu ta e fase di preparacion. Nan tabata spera e presencia di e tormenta aki ayera nochi mes den e Peninsula di Paria. Mientras cu na Aruba –segun pronostico- nos lo sinti algun efectonan di awa y biento awe nochi laat.
Segun sr. Oduber ta bisa cu nan lo sigui monitor e ultimo modelo a base di datonan di Hurricane Center, pa evalua si ta necesario pa bini cu un Tropical Storm Watch pa nos isla. Mas laat Meteo berdad a bin cu e alerta aki.
Potential Tropical Cyclone Two
Te ayera mainta e tormenta aki tabata desaroyando den Caribe na 660 kilometer for di zuidoost di Trinidad. E chens -segun modelo atmosferico- no ta grandi pa e desaroya; y mas bien e ta wordo categorisa como un “Potential Tropical Cyclone Two”. Te awor e ta keda e mesun escenario, segun sr. Oduber. Unabes cu e pasa Trinidad e tormenta lo drenta den un area cu e condicion no ta faborabel pa e tormenta aki desaroya. “Esaki por haci algun cambio y pone fluctua den forsa y e por debilita. Pero semper bo mester ta cauteloso…”, director di DMA a indica.
Minister Eman a laga sa cu intencion no ta pa crea inkietud den nos comunidad pero si pa nos comunidad ta bon prepara considerando cu eventualmente e tormenta aki lo trece yobidanan pa nos isla entre 15 pa 25 millimeter y porta localmente algun area lo por haya un tiki mas.
E biento lo keda por lo general den direccion oost pero e lo por cambia den direccion zuidoost tambe cu forsa pa maximo 30 pa 35 nudo. Sinembargo ainda ta dificil pa pronostica ya cu e intensidad di e tormenta por bira menos of e por bira mas fuerte.
P’esey un yamada ta wordo haci muy specialmente den e area cu semper ta confronta problema cu awa y/of inundacion pa mantene nan area limpi. Sr. Oduber a laga sa cu e condicion di lama lo bira un tiki bruto pa e parti noord di nos isla, manera temporada di Cuaresma. Ainda e proyeccion ta cu banda di e hotelnan lama no lo bira bruto.
