Tripulantenan La Rumbera mes a yega tera y haya ayudo di tribu Wayuu

Update: Nan ta yega diamars atardi cu Avianca cu mester yega Aruba 5.18.

Tin chens ainda cu e 9 tripulante di La Rumbera lo yega Aruba dialuna ainda. Esaki Uri Croes, representante di famia ta bisa Bon Dia despues a sali den noticia cu e grupo lo regresa diamars.

Croes a pone ayera nochi e ‘storia oficial di e rescate’ riba su Facebook. El a confirma awe mainta cu berdad esey a sosode: Diadomingo atardi momento cu e boto a yega hopi cerca di costo di Colombia y cu lama a bira hopi bruto, dos tripulante a dicidi ta miho pa nan bula na awa y landa bay tera. E otro 7  a keda den e boto y den tur e tormenta fuerte cu tabata tin, e boto mes a drief baiy tera, segun Croes. Eynan e resto a subi tera y pusha e boto riba beach. Despues  un grupo di mas o menos 30 indigeno di e tribu Wayuu a bin encontra nan, hunto cu e dos cu a bay busca ayudo prome. Di eynan e indigenonan a entrega e grupo  na Guardia Nacional, caminda nan ta te na e momentonan aki ainda, na e base naval na La Guajira, segun Croes. “Hollywood a keda kens!”, e ta remarca na final.