Ayera den un comunicado di prensa, Aruba Airport Authority a duna un actualisacion di cifranan di biaheronan cu a pasa den aeropuerto nacional den lunanan di september y october di e aña aki.

Na october, e prome luna di AUA Airport su temporada di winter 2020, 22,758 Revenue Generating Passengers (RGPs/Pasaheronan cu ta genera entrada) a biaha for di Aeropuerto Internacional Reina Beatrix (AUA Airport) pa diferente destinacion. Esaki ta 35% mas cu september 2020.

Den october 20,812 pasahero a biaha pa Merca, 1,487 pasahero pa Europa y 381 pasahero pa Antias Hulandes. E ultimo mercado a permiti solamente biahamento esencial te cu october 19, 2020 despues cu frontera cu Corsou y Boneiro a habri di nobo.

78 pasahero a sali tambe riba vuelonan humanitario pa destinacionnan den Caribe y Latino America.

E cifranan pa october 2020 ta 14.5% menos cu a premira pa e luna aki y compara cu 2019, AUA Airport a recupera 25% na october compara cu e mesun luna aña pasa.

Un averahe di load factor (LF) pa salida (cantidad di asientonan ocupa abordo di un avion na momento di sali for di AUA Airport) di 52% (excluyendo de-densificacion di e avion) pa e mercado Mericano a keda raporta entre october 1 te cu october 31, 2020, mientras e LF pa e mercado Europeo tabata na 38%.

Durante october, AUA Airport a procesa un averahe di 10 vuelo pa dia, compara cu 33 vuelo durante di e mesun luna aña pasa. Pa november 2020 AUA Airport a premira cu lo procesa aproximadamente 48,000 pasahero cu lo sali for di Aruba. E calculacion aki ainda lo por wordo afecta door di restriccion di biahamento cu ta aplicabel na diferente destinacion y tambe e efectonan di e pandemia en general rond mundo. Ta spera un recuperacion di aproximadamente 49% pa november 2020 compara cu november 2019 basa riba e cifranan actual.

“E temporada di winter 2020/2021 a cuminsa cu menos RGPs cu a premira pa october. Nos ta spera cu e cifranan pa november y december lo ta mas cerca di e calculacion premira pa e lunanan aki y cu e vuelonan indica door di aerolineanan partner lo continua manera ta plania pa e lunanan menciona te cu 2021,” asina Joost Meijs, CEO di Aruba Airport Authority N.V. a bisa.

Basa riba e ultimo indicacionnan ta spera cu AUA Airport lo termina e aña recuperando 35% – 40% di trafico di salida compara cu fin di aña 2019.