Triple A a bin cu reorganisacion memey di Covid crisis: 27 trahado a acepta pakete y 50 mas ta na peliger di perde nan trabao

E hecho cu gerencia di Aruba Airport Authority (Triple A) kier manda un grupo considerabel di empleado cas. Principalmente den e temporada dificil cu nos pais y henter mundo ta pasando aden pa causa di Covid-19. E situacion laboral aki a haci cu no solo sindicato, minister di Labor, Mediador di Gobierno, pero tambe Parlamento a cay aden.

Parlamentario Endy Croes (MEP) a laga sa cu nan ta compronde cu 27 trahado a dicidi di bay boluntariamente cas pa medio di negociacion di pakete di retiro. Pero tin un grupo di 50 trahado mas cu ta na peliger di perde nan trabao.

“Aparentemente Triple A ta pushando nan den un direccion pa reorganisacion,” el a bisa. E ta kere cu no ta na su luga actualmente pa pone mama y tata di famia na caya, den e momento aki cu nan no por haya otro trabao por lo pronto.

Awe un grupo di parlamentario lo bay tene un reunion cu Triple A pa asina purba cu e empresa estatal aki reconsidera nan intencion di retiro di mas cu 50 trahado. Ultimo dianan parlamento ta bin teniendo reunion cu diferente instancia, entre nan cu Atia diahuebs ultimo. Awe e comision parlamentario encarga cu empresanan estatal (NV) lo ta na Triple A, asina su presidente, parlamentario Edgard Vrolijk a informa.

Eynan nan lo tene nan reunion di comision pa atende e asunto di e grupo di personanan cu nan puesto di trahado ta na peliger den aeropuerto. Nan kier haya un splicacion riba e decision aki y con e reorganisacion aki ta bay ta. Pero e tipo di pakete di retiro cu Triple A ta ofrece na nan trahadonan.

Segun e parlamentario, Triple kier uza e oportunidad pa retira e trahadonan precisamente den e pandemia di Covid. Pues e solicitud cu ta wordo haci na Triple A ta pa no bin aworaki cu e medida aki. Mas bien reconsidera esaki te januari venidero pa bin cu nan plan di reorganisacion.

Tambe nan sa cu minister di Labor, Glenbert Croes a yega di manda un carta na departamento di Labor pa no honra niun solicitud di retiro pa causa di Covid. “Y nos como parlamentario responsabel tambe ta haci un apelacion na Triple A,” relaciona cu e casonan di e trahadonan cu nan ta pensa retira.

Parlamentario Croes a reitera cu nos ta den un momento hopi dificil caminda no solamente gobierno mester carga henter e peso aki, sino cu companianan estatal cu ta produci ganashinan considerabel pa medio di dividendo cu gobierno ta haya anualmente.

Pues e ta haya cu lo ta den su luga cu den e momento dificil aki, Triple A lo por reconsidera un rato nan intencion pa retira mas trahado. Y mas bien purba di traspasa e pandemia di Covid nos tur hunto, te un momento cu como pais nos lo por sali afo. “Pa asina nos por tuma decisionnan, mi ta kere, toch consciente,” el a bisa.