(TrinidadExpress) – No tin ningun morto relaciona cu vacuna di e mas di 1.3 miyon di dosis di vacuna contra COVID-19 cu a wordo duna na Trinidad y Tobago, e Minister di Salud Terrence Deyalsingh, a bisa.
E tabata contesta preguntanan durante e sesion di Senado. E senador independiente Anthony Vieira a puntra si e ministerio ta monitor reaccionnan negativo na e vacunanan.
Deyalsingh a bisa cu tur e reaccionnan negativo, na diferencia di e efectonan secundario, nan ta wordo monitorea y notifica na e Organisacion Panamericano di Salud (OPS) y e Organisacion Mundial di Salud (OMS).
“Den e administracion di mas di 1.3 miyon di dosis di vacuna, a informa di por lo menos di cinco pa dies reaccionnan negativo conoci y ni un a resulta den morto. Dus e ora e mensahe ta cu e vacunanan ta sigur”, el a bisa.
Deyalsingh a señala cu e cifra di mortalidad pa dia di COVID-19 ta di 15 pa 30 morto y el a insisti ariba vacunacion.
Den su contesta na otro pregunta di e senador Wade Mark, Deyalsingh a bisa cu tin un aumento di 50% den vacunacion pa loke ta trata e personanan cu ta ricibi nan prome dosis relaciona cu e trahadonan publico.
El a bisa cu te cu dia 9 di januari 2022, e cifra di personanan cu a ricibi nan prome dosis di un regimen di dos dosis ta 670.713. Personanan cu ta totalmente vacuna ta 674.618, locual ta representa 48.2% di e poblacion.
Deyalsingh a bisa cu locual e pais mester aworaki ta algo di solidaridad pa promove vacunacion.
