(TrinidadExpress) – Ministerio di Salud ta informa cu awor tin 450 caso di dengue confirma den laboratorio na e pais. Mortonan confirma ta keda na cuater, e ministerio a bisa den un comunicado di prensa. Dia 20 di juli, e ministerio tabatin 392 caso di dengue confirma.

E ministerio a recorda tur hende cu dengue por propaga door di e pica di un sangura Aedes Aegypti infecta.

El a declara cu sintomanan ta aparece den cinco pa seis dia despues di un pica, ta dura un pa dos siman y por inclui keintura, dolor di cabes ( tin biaha dolor fuerte), dolor atras di wowo, dolor di joints y di weso, rash na curpa, gana di saca y diarea.

E di cuater victima cu a fayece relaciona cu dengue a wordo reporta diasabra ultimo, cual su identidad no ta conoci ainda. Quinton Gabriel, di 16 aña di Siparia, tabata e tercer persona cu a fayece di dengue. E otro dos tabata otro mucha di 16 aña di Fyzabad y un meneer di 65 aña di Barrackpore.

Diabierna ultimo e ministerio a tene un rueda di prensa na su oficina principal na Port of Spain despues di un reunion cu oficialnan di Insect Vector Control Division, e Ministerio di Desaroyo Rural y Gobierno Local, y e 14 corporacionnan regional pa ataca asuntonan relaciona cu dengue.

Minister di Salud, Terrence Deyalsingh, a nota atrobe cu e areanan cu ta wordo afecta mas ta e municipionan Victoria, Caroni y St. Patrick.

Presente tambe na e rueda di prensa, director di Division di Epidemiologia, Ministerio di Salud, Dr. Avery Hinds, ken a contesta preguntanan tocante e grupo di edad di hende cu ta presentando cu e virus, bisando: “Loke nos ta ripara ta cu hende mas hoben, ku a nace den e populacion di awor ta e cu nan ta propenso pa e aumento nobo den e propagacion di dengue den e region y nos a nota cu mita di e casonan confirma ta den e grupo di edad mas hoben di mas o menos cinco pa 19 aña y e personanan mas bieu ta forma e otro mita, pero esaki no ta algo nobo, esaki ta algo cu bo ta mira ora bo tin e aumentonan general cu ta pasa cada decada.”

E ministerio a sigui duna conseho na e publico cu e miho manera pa reduci e incidencia di malesanan cu ta propaga pa sangura ta eliminando e luganan di criadero di e sangura Aedes.

Tocante e asunto di cumplimento pa mantene e casnan pa preveni fuente di criadero, 71 hende a ricibi advertencia te aworaki, e ministerio a notifica.

El a urgi hende pa tira loke nan no ta usa, vehiculonan cu no ta core mas of aparatonan den patio of cosnan cu por colecta awa y bira luga di criadero pa sangura.