Representante di Joint Trade Union Movement (JTUM) y Movement for Social Justice (MSJ) na Trinidad & Tobago a haci un yamada na e organisacion di pais Caribense, Caribbean Community (CARICOM),pa apoya e nacion hostiga di Venezuela en bista di e menasanan di gobierno Mericano.
Na un rueda di prensa diadomingo pasa, secretario general di JTUM, Ozzi Warwick,a bisa cu e grupo ta preocupa cu agresion creciente di Trump contra Venezuela. Warwick a adverti cu “Cualkier intento pa interferi y destabilisa Venezuela,finalmente lo destabilisa henter e region y Trinidad & Tobago en particular, cu ta asina cerca di Venezuela, e por tambe destabilisa nos propio pais.”
Khafra Kambon, presidente di e Emancipation Support Committee, a bisa cu un intento di golpi di estado o intervencion militar na Venezuela por tin consecuencia grave pa Trinidad & Tobago.
“Mi ta desea di haci un yamada na pueblo di Trinidad & Tobago pa reconoce loke e destabilisacion di Venezuela por significa, tumando na cuenta loke a tuma luga den tur e areanan unda Estadonan Uni lo a hiba democracia. Unda cu nan a hiba democracia te awor, nos ta mira desplaso, degradacion, y tur lo demas”, el a bisa. Kambon a bisa tambe cu Venezuela na djis shete miya di distancia, Trinidad & Tobago lo experimenta un fluho di refugiado.
Lider di MSJ David Abdulah a bisa cu Trump a expresa menasa abierto pa kita presidente di Venezuela Maduro di su puesto.
“Ta hopi importante cu paisnan chikito manera Trinidad & Tobago y otro pais den Caribe respeta e principionan internacional aki (entre estado) y cumpli cu nan pasobra si nos no lanta para y expresa nos mes contra Estadonan Uni y otronan cu ta desea di viola e principionan ey interferiendo den e asuntonan interno di Venezuela, o atenta contra soberania di Venezuela cu agresion militar, anto kico lo por pasa cu nos como pais hopi mas chikito? Anto nos lo no tin ningun hende papia na nos fabor si intervencion externo tuma luga na Trinidad & Tobago,” el a expresa.
