Mientras Venezuela ta continua cu su crisis politico y socio-economico, e nacion di dos isla ta continua lidiando cu e problema di e ciudadanonan Venezolano cu ta busca refugio na e islanan den un fluho creciente.
Trinidad ta situa dilanti costa di Venezuela, na un distancia di apenas 14km , y pa Venezolanonan cu ta busca forma di huy di miseria y violencia, e ta un di e opcionnan mas facil. Cierto di nan ta yega scondi, otronan ta drenta via puertonan oficial di entrada. Ta calcula cu e pais a haya mas di 60.000 migrante caba, y e cifra ta subiendo.
Algo mas di un aña pasa, na april 2018, Trinidad & Tobago a haya critica severo di United Nations Refugee Agency (UNHCR) pa e deportacion forzoso di 82 ciudadano Venezolano cu tabata pidi asilo. Den un declaracion na UNHCR, gobierno a bisa cu, aunke el a firma e Tratado encuanto Refugiado di 1951, y ta firmante tambe di e Tratado di ONU contra Crimen Organisa Transnacional, y e tratado di ONU encuanto proteccion di Derecho di tur Trahador Migrante y Miembro di Famia, “un falta di legislacion a stroba e aplicacion di principionan apropia di proteccion pa refugiado y esnan cu ta busca asilo.”
Awor e pais ta tratando di coregi e asunto, cu gobierno aprobando na april pasa un maneho di registracion pa refugiado Venezolano, cu ta permiti nan busca empleo y ofreciendo amnistia pa migrante indocumenta. Oposicion ta bisa cu e plan ta mal concebi, pero Camara di comercio y Industria di T &T a laga sa cu “e ta permiti un mecanismo pa registra e decenas di miles di migrante y ta duna cierto nivel di dignidad sigurando cu nan ta reconoci legalmente, asina preveniendo cu ta explota nan.”
