Trinidad & Tobago no ta busca ayudo di IMF apesar di situacion economico dificil

PORT OF SPAIN, Trinidad – Prome Ministro Dr Keith Rowley ta bisa cu su gobierno lo no acerca Fondo Monetario Internacional (IMF) apesar di biyones di dollar na entrada perdi den ultimo par di aña.

Rowley tabata dirigi palabra den e forum ‘Spotlight on Trinidad and Tobago’s Financial Circumstances – the Road Ahead’ siman pasa. E prome ministro a bisa tambe cu e pais no lo recuri na medidanan usa den añanan 90 pa controla cambio di divisa.

“Nos lo no bolbe na e controlnan di divisa cu nos tabatin prome cu 1993, pero sigur no lo ta usando nos reservanan di divisa na nivelnan cu lo maximalisa nos importacionnan. Tempo cu nos a tuma e decision na 1993 pa laga mercado substancialmente determina e tasa di cambio, nos tabata acepta en principio cu nos lo a biba cu cualkier tasa di cambio di divisa. Den e periodo aki di reduccion significante di entrada di divisa, lo ta irasonable y peligroso pa usa tur nos divisanan manera nos tabata custumbra haci. Esaki lo habri caminda pa manda nos directamente den brasa di IMF, y esey ta algo cu gobierno no ta dispuesto di haci.”

Concerniente e sector di energia di e republica di dos isla, e prome ministro a revela un caida den entrada di 90% entre 2014 y 2017. El a añadi cu debi na e caida masivo den entrada, sector publico por sufri e consecuencianan.

“Un di e preocupacionnan mayor ta e nivel di empleo publico. Y desde cu entrada gubernamental a cay asina pecipitadamente, ta di anticipa cu empleo den sector publico lo ta den problema serio. Gobierno ta luchando seriamente pa mantene e nivel di empleo stabiel, tambe mientras nos ta bahando e nivel di gasto.”

Segun Rowley, e situacion encuanto entrada gubernamental na 2018 ta keda uno hopi desafiante y gobierno lo ta tumando paso pa sigura cu ta optimalisando su mecanismonan di cobransa.

El a bisa cu ta enfrentando un posible deficit na 2018, y mas reduccion di gasto lo ta inevitable y el a urgi e poblacion pa ta paciente.

“Mientras nos ta posiciona nos mes pa haci mas cu menos den futuro, nos lo mester mantene cierto restriccion na e momentonan aki,” Rowley a bisa.