Capital di Trinidad & Tobago, Port-of-Spain, a conoce un aumento grandi di tiroteo indiscrimina, cu a costa bida di bastante hende inocente. E victimanan ta varia di un bendedor riba caya, un señora di edad, un muhe hoben cu tabata haci compra, te na un mucha na caminda pas cas despues di scol.
Na fin di aña pasa e pais a haya e noticia cu un tiroteo den centro di Port-of-Spain a costa bida di un persona, mientras no menos cu nuebe otro persona a keda herida. Aña a habri cu otro tiroteo cu a ocasiona tres victima cu no tabatin nada di haci cu e problema.
E personanan aki cu pa casualidad tabata na e lugar unda e violencia a cuminsa, ta victima di un creciente tendencia di violencia cu arma di candela na Port-of-Spain, cu consecuencia cu no tin seguridad den e ciudad, ni pa negoshi, ni pa diversion.
Pa 2019, polis a logra pone man riba 102 arma di candela na Port-of-Spain. Mientras esey ta un cifra abao compara cu otro partinan di e pais, Port-of-Spain tabata e unico region cu a conoce un aumento di tiroteo indiscrimina cu arma di poder halto.
Segun un encuesta entre ciudadano tocante seguridad na 2010, Port-of-Spain tabatin e tempo ey caba cifra mas halto di crimen pisa cu e otro regionnan y esey no a cambia den e añanan despues. Recientemente Port-of-Spain tabata yega na 4.800 caso di crimen grave pa cada 100.000 habitante.
Ministro di Seguridad Nactional Stuart Young a bisa siman pasa cu tabatin intento delibera pa destabilisa e pais den e reciente aumento di crimen y cu e ciudadano mester enfrenta posible acto di teror y di violencia, cu mas asesinato y mas tiroteo sin distincion di persona.
