Na Arouca, Trinidad, 69 persona entre 19 y 70 aña a ser rescata ayera marduga di un centro supuestamente di rehabilitacion di adicto, unda nan tabata cera den haula y cierto di nan hasta cu handboei. E centro tabata banda di un iglesia y ta liga na esaki.
Ta kere cu e personanan ta victima di loke por yama ‘sclavitud moderno’ y ‘trafico humano’, segun comisario di polis Gary Griffith cu a papia cu reportero di T & T Guardian pafo di e ‘Transformed Life Ministry Rehabilitation Centre’.
“Loke nos ta kere ta cu nos a kibra loke ta parce e caso mas grandi di trafico humano na e pais aki. Algun di nan ta bisa cu nan tabat’ey pa varios aña. Esaki ta un caso grandi y nos mester investiga cada un di nan. Esaki ta practicamente sclavitud, di loke nos a mira. Algun di nan ta bisa cu nan a tortura nan. Esaki tabata un negoshi grandi… famianan tabata paga pa nan tin nan ser keri aki y nan tabata gana placa cu e abuso aki,” Griffith a declara. El a describi e scenario como ‘barbaro’. “Personanan den haula, cu handboei, tortura.” Durante e accion di e Special Operation Response Team (SORT) di polis di Trinidad & Tobago, a topa cu 65 homber y 4 muhe, y a aresta na e lugar 6 persona, entre nan e pastor responsable.
Un persona a sali na defensa di e pastor y a bisa cu no ta berdad cu ta trata di trafico humano. El a bisa cu ta trata di un centro di rehabilitacion pa adicto y cu e pastor tabata tene e lugar cera pa nan no por huy. El a desmenti cu tabatin hende mara, mientras polis a constata otro. Segun Guardian a haya sa tabatin famia cu tabata paga $ 5.000 pa tene un persona den e centro.
