E prome actividad cultural organisa na Biblioteca Nacional Aruba (BNA) a tuma luga diaranson anochi bou e titulo: Homenahe, Tributo y Reconocimento na Heroe.

Directora di BNA, Astrid Britten a bisa cu e programa aki  tambe tabata dirigi den cuadro di nos 63 carnaval, y specialmente riba e figura di “John-John” Flemming como “un carnavalista hopi grandi sigur pa e bario di Santa Cruz”. Tambe el a bisa cu e reconocimento aki tambe ta extensivo pa hopi carnavalista pasobra hopi amor y empeño nan ta hinca den henter proceso di carnaval. “Hopi ta bisa cu e carnaval ora cu e pasa esey no ta e cos.  E cos ta e preparacion prome con nan ta pone cu hopi dedicacion delaster un stenchi y payet pa haci e cos algo grandi y significativo tambe”, el a bisa.

Heroenan
E linguista y promotor cultural Mirto Laclé a laga sa cu e actividad aki organisa conhuntamente cu Departamento di Cultura Aruba y IPA; y tambe Romar Training como sponsor, su meta tabata esun di rindi tributo na nos heroenan di residencia durante II Guera Mundial: Boy Ecury y George Maduro. Pero tambe rindi un homenahe na bida na  nos heroenan di Carnaval y diseñadornan. Como antesala a wordo presenta un pelicula cortico riba e fiesta popular na Cuba, e famoso Carnaval di Cuba prome y despues di nan revolucion Castrista di 1959. Durante su presentacion como MC, Laclé a mustra entre otro e  similitud y diferencia entre diferente aspectonan di Carnaval den otro pais compara cu esun di nos pais mes. Tambe algun potretnan di balor historico relaciona cu e desaroyo di nos Carnaval. Igualmente e influencia entre Trinidad y Aruba encuanto Carnaval, caminda Laclé den su investigacion ta mustra e elemento Amer-Indio y Africano cu directo of indirectamente ta presente den nos Carnaval.

E anochi aki a wordo honra e aporte valioso cu diseñadornan di e taya di “John-John” Flemming, Rhyan Maduro, Michael Douglas  y Elvis Lopez  cu a embeyece y bisti di luho nos Carnaval. “E bunita di e diseñadornan aki ta, tur ta competi cu otro, pero di un forma sano”, Laclé a bisa.

Charla
E anochi cultural aki a conta cu presencia di Dr. Valika Smeulders di nos isla ruman Corsou y residencia na Hulanda, cu a duna un charla magistral cu documentario. Laclé a bisa cu recientemente den compania di Dr. Smeulders nan a haci un recorido na Den Haag riba e ruta di e heroenan di e resistencia, kende a papia di “Herencia”. Na final di e charla aki durante e ronda di pregunta directora di BNA a haci un remarca cu a cay den bon tera. El a bisa cu ora el a haci e tour na den Haag hunto cu Dr. Smeulders, el a lamenta cu e unico di nos heroenan cu no tin un monumento of estatua na Hulanda ta Boy Ecury. “Kisas algo cu mester pensa pasobra nos Boy Ecury tambe mester haya un luga na Hulanda”, el a bisa.

E ambiente musical tabata na encargo di e hoben talentoso y musico multi instrumental, Festus Bargues, kende a bira ganado absoluto di Manic Monday. E hoben aki a haci un demostracion impresionante di su habilidad pa toca mas cu cinco instrumento musical. Tambe a  wordo gradici na famia Stamper cu  e contribucion cu a yega di duna di canta Dande na BNA. Igualmente a recorda e feliz memoria di sr. Rufo Odor (d.f.m.)  y su contribucion pa  nos cultura y tereno di decencia na Aruba.

E tabata un anochi cultural masha ameno y cu a conta cu presencia di un publico masha entusiasma cu a gosa di e bunita programa bon hinca den otro.