Maximo tribunal di Venezuela (TSJ) a dicidi pa tuma e competencia y poder cu parlamento venezolano, di mayoria opositor, tabatin, te momento cu asamblea nacional por sali for di e situacion di desacato. AN a haya un estado di desacato proclama den un sentencia cu a ser publica na aña 2016. Dirigente di partido di oposicion Voluntad Popular a denuncia un golpi hudicial di banda di gobierno di Nicolas Maduro contra asamblea nacional (AN).
“Mientras e situacion di desacato y nulidad riba tur decision di asamblea nacional ta continua, e sala constitucional di tribunal supremo di husticia lo garantisa cu e competencia of funcion cu parlamento (AN) tabatin, lo bira un funcion di e sala aki of di algun otro organo cu e sala por scoge, y asina husticia venezolana por cuida e estado di derecho”, Tribunal Supremo di Husticia a skirbi den nan sentencia.
Mientras tanto, partido Voluntad Popular a publica riba Twitter: ”Awe Nicolas Maduro a kita su mascara y a declara un dictadura cu e golpi cu ayera a duna e Asamblea Nacional(AN)”. Tribunal Supremo di Husticia (TSJ) a declara asamblea legislativo den desacato na aña 2016, pasobra nan a huramenta tres diputado opositor, cu tabata suspendi pa un supuesto fraude electoral. Nan a anula tur decision cu a bin for di asamblea tambe den mesun decreto di aña 2016. E sentencia di e sala constitucional di corte a sali como un respuesta na e recurso di interpretacion tocante Ley Orgánica di Hidrocarburos (ley cu ta goberna produccion di petroleo y gas). E ley aki ta indica cu gobierno mester aprobacion di parlamento, ora cu nan kier forma of crea un empresa mixto den e sector petrolero.
Awor cu e tribunal a declara nulo tur decision di asamblea legislativo, y ta mira e asunto manera un ‘omision legislativo’, TSJ a bisa cu gobierno Venezolano no tin ningun impedimento pa crea algun empresa, sin mester autorisacion di parlamento. E decision hudicial a bin un dia despues cu TSJ a kita inmunidad di parlamentario tambe. E decision aki ta habri un posibilidad pa gobierno di Maduro, cu por cuminsa un huicio contra legisladornan y tambe posibilidad cu nan por keda investiga y enhuicia pa delito militar.
E decision aki a sali ora cu Conseho Permanente di Organisacion di Estado Americano tabata reuni debatiendo e crisis politico y economico di Venezuela. E grupo di oposicion a pidi, pa aplica e carta democratico interamericano y asina sanciona e gobierno. E acto aki a keda califica pa Maduro como un “traicion na patria”, delito cu ta castigabel na Venezuela cu un pena te 30 aña di prizon.
