Un tribunal militar a ordena diamars pa mantene deteni 27 studiante Venezolano cu a wordo deteni na universidad di Maracay (norte) despues di protestanan contra presidente Nicolas Maduro, Foro Penal a informa. Corte a dicta prizon na cas pa cinco muhe tambe, cu a wordo deteni diadomingo cu a pasa den mesun operativo.
“Fiscal a acusa nan di delito manera instigacion pa rebelion, horta instrumento for di forsa arma y destruccion di un zona di seguridad, Alfredo Romero, director di Foro Penal a splica.
Romero a informa cu e acusadonan a ser manda pa dos prizon comun. Segun Romero cu e caso aki awor Venezuela tin 433 preso politico. Audiencia a tuma lugar dialuna anochi y diamars marduga. Audiencia a tuma mas di 10 ora pa finalmente comunica un decision.
E grupo di hoben a keda deteni diadomingo cu a pasa ora cu nan tabata paden na nan Universidad Pedagogico Experimental (UPEL ) na Maracay.
Luis García, dirigente di studiante di UPEL, a bisa cu su compañeronan a keda deteni pa efectivo di seguridad cu tabatin cara tapa y tabata usa paña full preto. E funcionarionan a viola autonomia universitario, pasobra nan a drenta den UPEL pa cuminsa cu proceso di detencion.
Diahuebs cu a pasa polis a detene 31 studiante mas den un protesta di oposicion na Caracas. Diadomingo nan a haya libertad pleno.
