(AP)—Un tribunal riba ley maritimo di e Organisacion di Nacionnan Uni (ONU) a bisa ayera cu paisnan ta legalmente rekeri pa reduci contaminacion di gasnan di efecto invernadero, cual ta un victoria pa nacionnan isla cu ta e promenan pa sinti e efecto di cambio di clima.
E International Tribunal for the Law of the Sea a descubri cu emisionnan di carbon ta cualifica como contaminacion maritimo y a bisa cu paisnan mester tuma stapnan pa mitiga y adapta na e efectonan negativo.
Esaki tabata e prome huicio pa surgi den tres caso den cual opinionnan di conseha a ser busca for di cortenan internacional tocante cambio di clima. Expertonan ta bisa cu e decision, aunke no ta legalmente vinculante, por afecta ley internacional y domestico riba cambio di clima profundamente. “E opinion ta un clarificacion di obligacionnan legal internacional,” segun Joie Chowdhury, un abogado mayor di e Center for International Environmental Law.
China, Rusia y India ta entre e 169 partido envolvi den e U.N. Convention on the Law of the Sea, un trato cu ta sostene e corte. Merca, cual ta e emisor mas grandi di gasnan di efecto invernadero, no ta un partido.
“Partidonan conecta na e convencion tin un obligacion specifico pa tuma tur medida necesario pa preveni, reduci y controla contaminacion maritimo for di emisionnan antropogenico di gasnan di efecto invernadero,” segun hues Albert Hoffman a conta un camber di corte na Hamburg, unda e tribunal ta basa.
Commission of Small Island States on Climate Change and International Law a haci e peticion pa e opinion na 2022, cual ta un coalicion di nacionalnan lidera pa e nacion Caribense di Anitgua y Barbuda y e pais Pacifico di Tuvalu.
E grupo a puntra e corte pa specifica ki obligacion e signatorionan di e trato maritimo tin den relacion na e efectonan di cambio di clima causa pa actividad humano, y pa proteha e medio ambiente maritimo for di calentamento di ocean y aumento di nivel di awa.
Islanan chikito ta entre e nacionnan mas vulnerable pa cambio di clima, enfrentando lamanan avansa riba tera, registrando temperaturanan nunca bisto antes y un aumento den tormentanan severo. Aña pasa, Austrialia a ofrece pa permiti residentenan di Tuvalu relocalisa pa scapa e efectonan di cambio di clima.
Temperaturanan di ocean en particular a subi, cual ta empeorando e impacto riba estadonan costero. “Sin accion rapido, cambio di clima por preveni mi yiunan y nietonan biba riba nan cas acnestral,” Gaston Alfonso Browne, e prome minister di Antigua y Barbuda, a conta e tribunal aña pasa.
Cambio di clima ta riba e kalender den cortenan internacional. Aña pasa. E mesun grupo di nacionnan isla a puntra e Corte Internacional di Husticia pa ta envolvi tambe. E curpa hudicial mas halto di ONU ta plania pa tene audiencianan otro aña y mas cu 80 pais a puntra caba pa participa.
Procedementonan di cambio di clima tambe ta na caminda na e Corte Inter-Americano di Derecho Humano. Chile y Colombia a puntra e curpa regional pa duna un opinion consultivo riba ki obligacionnan pais den e continente Americano tin pa aborda emision di gasnan di efecto invernadero.
E decision di ayera ta sigui un huicio pa e Corte Europeo di Derecho Humano, cual a haya cu e 46 miembronan di e Conseho di Europa tin un obligacion legal pa proteha nan ciudadanonan for di e efectonan negativo di cambio di clima. E corte tabata e prome curpa hudicial internacional pa duna huicio riba cambio di clima.
