Un tribunal di provincia di Santo Domingo – Republica Dominicana,  a dicta un condena di un aña di prizon preventivo, contra un sacerdote cu ta acusa di a abusa sexualmente y mata un menor di edad, abogado di religioso a declara. E persona acusa ta Elvin Taveras Durán, acusa di a asesina Fernely Carrión, di 16 aña. Taveras Durán tabata abusa Carrión tambe sexualmente. Segun famia di Carrión , su curpa a aparece dialuna, cuatro dia despues cu Carrión a sali for di cas pa reuni cu e religioso Durán, caminda esaki supuestamente tabata duna e ‘monaguillo’ (misdienaar) placa.

Den audiencia,  na oficina di atencion permanente di provincia di Santo Domingo, “e religioso tabata warda silencio na tur momento,” asina medionan local a informa despues di entrevista su abogado Miguel Liria González. E abogado a informa cu e lo studia e posibilidad di impugna e medida di prizon preventivo, cu a ser dicta contra su cliente. E abogado a reconoce cu e medida ta conteni den Codigo penal di Republica Dominicana, pa caso manera esaki.

“Un hues a impone e medida y mi mester acepta, unico cos cu mi mester haci ta presenta un apelacion y warda pa su revision obligatorio,” Liria González a declara. Gonzales a sigura cu el lo presenta tur prueba cu ta faborece su cliente.

Ministerio publico a solicita un aña di prizon preventivo contra e sacerdote aki. E caso tin hopi misterio y polis no a duna informacion ainda di e caso aki. Despues di e medida preventivo contra e sacerdote, den un comunicado Ministerio publico a publica su informe forense,  cu ta bisa cu e hoben a muri pa dos golpi fuerte cu el a haya cu un martiu,  y su curpa tabatin mas herida tambe cu a ser produci pa un arma blanco.

Segun investigacion, despues cu e sacerdote a mata e hoben, el a hinca e curpa den un auto y a tir’e for di un baranca na Bayaguana, municipio di provincia Monte Plata (sureste).
Den mesun comunicado, Olga Diná Llaverías, fiscal di Santo Domingo a splica cu lo mustra na audiencia e responsabilidad penal di e sacerdote acusa y tur circunstancia den cual el a comete e asesinato.”

Despues di cu e informacion aki a bira  publico, Arquidiocesis di Santo Domingo a anuncia e suspension di Taveras Durán di su ehercicio sacerdotal.  Nan a bisa cu nan ta disponibel pa colabora cu tur informacion den e proceso hudicial y a solicita na autoridadnan pa haya sa e berdad y pa duna e sancion cu ta estableci den codigo penal.