Tribunal Supremo Electoral (TSE) di Bolivia no a aproba e candidatura di Evo Morales como senador pa districto di Cochabamba. E organo a tuma mesun medida cu e ex-canciyer Diego Pary, ken tabata aspira e funcion di prome senador pa e districto di Potosi.
Cu e decision aki, e organo electoral a cera e debate cu a cuminsa dia 29 di januari, tempo cu a anuncia cu Morales lo bolbe Bolivia pero como senador, loke a provoca speculacion di tur grupo politico.
Di acuerdo cu algun fuente di e corant di Bolivia El Deber, e vocal di TSE a duna di conoce e argumento di e decision ayera.
Luis Arce, candidato pa presidencia di e partido di Morales (MAS), lo competi sin niun tipo di restriccion. Diamars ultimo presidente Argentino, Alberto Fernandez, a ricibi su persona na Casa Rosada.
Arce, faborito den encuestanan, a mustra sigur durante un charla cu e lo gana e prome buelta di e eleccionnan di luna di mei y cu e lo bay ta esun cu lo tuma e decisionnan y no e ex-mandatario, e Gobierno lo mester concentra riba ‘reconstrui e economia’ cu a ser destrosa pa e Ehecutivo ‘de facto’ di Jeanine Añez.
Den un entrevista na Buenos Aires, na unda Morales ta biba desde dos luna atras, ken e ta califica como ‘lider indiscutibel’ di su partido, Arce a mustra contento pa un encuesta reciente cu a dun’e un 31,6% di intencion di voto, dilanti di su competido principal Carlos Mesa (17,1%) y Añez (16,5%), pero el a afirma cu lo por haya mas.
