(AP) – Un tribunal Colombiano a ordena aresto domiciliario pa cinco dia di e presidente Ivan Duque, un decision hudicial unico den historia reciente di e pais y cu a keda conoci diasabra ultimo na unda e mesun mandatario a califik’e como “inconstitucional”.
Na Colombia e presidente ta gosa di fuero cu ta impedi su detencion y Congreso solamente por kita esey, pa loke su aresto no ta efectivo.
Minister di Husticia, Wilson Ruiza a sigura den un declaracion oficial cu e decision na prome instancia di Tribunal Superior di Districto Hudicial di Ibague no ta firme pa motibo cu prome mester facilita “e grado hurisdiccional di consulta na Corte Supremo di Husticia”.
Pa e hefe di cartera di Husticia, e tribunal “no ta conoce su mesun capacidadnan” ora a ordena un sancion di e naturalesa aki contra e hefe di Estado “den cual su fuero constitucional no a wordo tuma na cuenta cu e claro violacion di ordenamento huridico”.
E tribunal a ordena e sancion na Duque pa presuntamente no cumpli un sentencia di aña 2020 den cual tabata ordena protege Parke Nacional Natural Los Nevados, declara suheto special di derechonan pa su proteccion, recuperacion y conservacion.
“Como presidente di Republica y cu mi funcionarionan nos a bin trahando pa cumpli cu e proteccion di Parke di Los Nevados, e sentencia ey a wordo cumpli caba y tin rapportnan di esey”, Duque a declara na su defensa den un acto publico.
Parke Nacional Natural Los Nevados ta un area protegi for di 1974 pa conservacion di glaciar y un reserva di awa pa departamentonan di Tolima, Risaralda, Caldas y Quindio.
