Ayera un persona a publica un video riba Facebook graba na Malmok, caminda ta wordo mustra un tribon masha activo cerca nos costa noord.
E video aki a produci algun reaccion di panico y miedo, specialmente cerca e bañitanan cu ta gusta disfruta di nos bunita lama, specialmente den e area ey.
Bon Dia Aruba a comparti e video aki cu e Biologo Marino, Byron Boekhoudt kende a base di su experticio y profesionalismo a bisa cu aparentemente ta trata di un Caribbean Reef Shark.
El a indica cu e tipo di tribon aki ta un especie normal den nos awanan. “Nan ta masha comun den nos awanan. E ta un di esunnan mas mira, nan sa bin hopi cerca nos costa.” E presencia di e tipo di tribon aki ta full rond di nos costa ya sea den area seco y hundo di nos lama.
Si e ta peligroso of no, e ta laga sa cu e ta algo complica. Sr. Boekhoudt su opinion personal ta cu e tribon aki no ta peligroso, pasobra tur dia nan t’ey y masha poco sa tin incidente relaciona cu nan. Pero e ta depende di e circunstancia, ya cu si bo ta haya un tribon den un estado di stress, manera e video ey ta mustra, e lo por resulta peligroso pasobra e ta un bestia salvahe cu hopi djente.
E ta enfatisa cu den masha poco incidente di atake di e tipo di tribon aki a keda registra. “Sigur incidente sin provocacion, segun mi ta masha masha abou, casi no existente.”
Sinembargo e ta indica cu ta mas cu claro cu si bo ta wak un tribon manera den e video cu ta den stress, nos mester uza nos sentido comun y evit’e. “Si hende ta comporta y uza sentido comun, no mester tin problema. Esaki ta demostra den historia”, segun Sr. Boekhoudt
