Ministerio Publico ta informa cu e investigacion di e asesinato of homicidio di e homber Canades riba prome di mei 2017, a avansa te na punto cu tin sospechonan serio contra solamente un sospechoso Canades pa e crimen aki. Den e caso aki, sospechoso Canades Michael Teddy Gibson. E otro tres sospechosonan Canades a wordo poni den libertad awe.
Segun Ministerio Publico, berdad nan tabata presente ora e crimen a tuma luga, pero for di investigacion no a sali cu nan tabata tin algo di haber cu e crimen. No tin sospechonan serio contra nan y door di esey no tin mas motibo pa mantene nan den detencion preventivo, segun Ministerio Publico ta laga sa.
Sospechoso Gibson
E sospechoso Gibson ta deteni ainda. Manera cu nos a informa, 1 aña atras, Bon Dia Aruba a trece e noticia di un di e sospechosonan Gibson dilanti como cu e la drenta Aruba pero nunca mas a sali bek. Gibson lo a tira Julian Weekes di 27 aña den e marduga di April 2 2016 dilanti di FUSE Restaurant na 366 Queen Street. Weekes asina mes a logra cana yega na e parkeer plaats di un Shell gas station, na unda e la cay den otro despues di a ricibi varios impacto di bala na su curpa y fayece na e sitio. Polis na Toronto ta bisa cu Weekes lo a bay un acto di condolencia pa un amigo di dje cu a wordo tira mata ariba Maart 24. Investigacion a bin determina cu esun cu a tira ta Michael Teddy Gibson di 29 aña (e tempo ey). Segun polis a sigui bisa Weekes y Gibson conoce otro, y cu nunca Weeks a considera Gibson como menasa pe. Polis a sigui bisa tambe cu danki na testigonan di unda e incidente e tuma y tambe camara di siguridad cu nan ta ken a tira. Gibson, kende tambe ta wordo yama Tyrone lo a drenta Aruba ariba April 5 2016, pues tres dia despues cu e la comete e asesinato na Toronto y no a sali mas di e isla.
Version policial di caso Jaburibari
Riba 1 di mei ultimo pa mas o menos 05.21 melding a drenta via Centrale Post cu un persona a wordo asesina na Jaburibari. Ora patrouille a yega na e sitio enberdad a constata un persona drumi ariba vloer cu no ta duna señal di bida. Dr Cime Texier a constata morto 07.00 y e curpa wordo tuma den beslag door di fiscal Rammeloo. Un rato despues un persecucion a cuminsa na altura di McDonalds Palm Beach di un KIA Sportage numera V-966. Na e momento cu nan a wak patrouille pa un motibo of otro nan a pasa door di luz cora, treciendo bidanan di otronan na peliger y core bay nengando stopteken di polis. E persecucion a termina na altura di Aruba Bank Hato caminda cinco persona a wordo deteni, tres masculino y dos femenino. Durante persecucion, un di personanan den e auto a tira un gran cantidad di biljetenan for di auto y probablemente mas cos. Na unda e biljetenan a wordo tira ariba caminda un cantidad a wordo tuma den beslag. Investigacion lo determina si nan tabata tin di haber cu e caso na Jaburibari.
