E caso di e atraco riba Excelsior Casino, no a bay sin cu a dicta castigo. Tres di e cinco sospechosonan (V.A., G.C., H.I.) a haya 5 aña di prizon, mientras cu e caso di e otro dos sospechosonan (F.A.C y V.A.) lo wordo trata dia 13 di mei proximo. Esaki ta debi cu hues a haya cu tabata tin hopi contradiccion den e declaracionnan di e acusadonan C y di A. Pa tal motibo a dicidi di pospone nan caso y asina haya un poco mas tempo pa analisa y studia e caso di nan mas miho.
Mientras tanto cu fiscal mr. Erades a haya legalmente proba cu e acusadonan tabata involucra den e atraco arma aki na Excelsior Casino. Pero ta tene a consideracion cu e sospechosonan a coopera den e investigacion pa cual motibo fiscal a pidi 5 aña di castigo pa e tres sospechosonan Venezolano. Hues lo dicta sentencia na un otro fecha ainda no stipula.
E caso
E 5 sospechoso tabata involucra den e atraco na dicho casino, cual a hala hopi atencion no solamente riba e dia mes, pero tambe durante tratamento di e caso den sala di corte. E sospechosonan V.A., G.C., H.I., A., C. y G. tabata wordo acusa di, conhuntamente cu un of mas persona, a comete a atraco cu violencia bayendo cu un suma di placa como tambe celularnan, joyas, holoshi y tambe cartera di e trahadonan. Por ultimo tambe nan a bay cu yabinan di un casino. En total ocho persona a wordo maltrata ora cu e atraco a tuma luga dia 26 di October 2015.
Hues Mr. Paulides a cuminsa tratamento di e caso caminda el a cuestiona e hecho, cu e acusadonan V.A., G.C., H.I. a bin Aruba netamente pa comete e atraco, pa despues huy bay bek Venezuela, manera nada no a pasa, mientras cu supuestamente nan a bin cu vakantie Aruba. Hues a puntra e acusadonan si nan tabata tin trabao na Venezuela. Di un of otro manera, tur e acusadonan tabata tin un entrada pa por a biba decente. Un di e acusadonan, V.A., a bisa Hues cu e tin hopi problema na Venezuela y cu constantemente e ta wordo menasa cu morto, como tambe cu e ta victima di extorsion.
E dos acusadonan local, F.A.C y V.A. tambe tabata presente den Corte. F.A.C. ta un recidivista cu durante ultimo añanan tabata hopi den problemanan cu husticia. Pa hues e ta un di e cabesantenan di e atraco, un di e mastermindnan hunto cu V.G, kende por cierto ta un ex trahado di Excelsior Casino.
Hues a puntra V.G. e motibo di con diripiente e no ta trahando mas na casino. Segun V.G. e tabata tin problema cu salud y cu p’esey for di Juni 2015 e no ta trahando mas, ya cu el a bay Venezuela busca su salud.
Awo lo keda pendiente kico hues lo bay saca afo di e investigacionnan cu e lo haci pa loke ta trata e dos personanan local envolvi den e caso di atraco aki. Mientras tanto nan ta keda encarcela te ora cu nan huicio tuma luga y un decision cay kico lo pasa cu nan.
