Segun resumen diario di Departamento di Salubridad Publico DVG riba e desaroyo di pandemia di Covid-19 na Aruba, ayera lamentablemente tres residente a fayece cu e malesa.
Ademas di e tres residente, DVG a informa cu un persona indocumenta tambe a fayece, y ningun di e cuatro personanan aki tabata vacuna. Cu esaki, e cantidad total di fayecido relaciona cu Covi-19 a aumenta na 132.
DVG a informa tambe cu ayera tabatin 107 persona cu a recupera di e malesa. A registra un total di 74 caso nobo di Covid-19, di cual 70 ta residente y 4 ta turista. E cifranan aki ta representa un tasa di positividad entre nos residentenan di 24 porciento.
E cantidad di caso activo ayera tabata 731.
Segun DVG, datonan di Covid ta ilustra casonan nobo cu un averahe semanal di 83 caso pa dia y un averahe di tasa di positividad semanal di 25 porciento pa dia.
Actualmente tin 68 persona hospitalisa pa ricibi tratamento pa e malesa causa pa e virus SARS-CoV-2. Di esakinan, 18 ta hospitalisa na Colombia den ICU, y DVG a informa cu un di nan a fayece.
E resto ta hospitalisa na Aruba, di cual 11 ta den Unidad di Cuido Intensivo (ICU) y 39 riba piso general.
