Diahuebs mainta a drenta un informe cu tres persona indocumenta cu tabata deteni na Guarda Nos Costa (GNC) di Dakota a logra huy sin cu niun trahado cu tabata riba warda na e momento ey por a ripara. Den e caso aki, tambe a haya sa cu cinco trahado di e departamento en cuestion a ser manda cas bao investigacion.
Esaki no ta prome biaha cu detenidonan den GNC ta sali y huy for di e luga. Tempo cu e anterior director Richard Kramers tabat’ey, esaki tambe a sucede y awor Susy Nadal, ken ta e director actual, a haya su prome strike.
Segun fuentenan cu a tuma contacto cu redactor di Bon Dia Aruba, e tres persona aki a bay kibrando e beton na unda no tin informacion di ken nan ta, si nan tin antecedentenan penal of no, ni un hende sa, solamente cu nan a yega cu boto.
Ta supone cu ora e funcionarionan di GNC a bay haci nan control marduga, nan a ripara cu tabata falta hende y a purba tuma contacto cu leiding pero nan no a haya contesta.
Loke ta hala atencion ta cu e tres persona aki a comete destruccion pa por scapa di e luga pero ni un di e trahado di GNC a tuma contacto cu polis mesora y nan a warda te mainta pa hacie.
Falta di personal ta algo cu ta hopi importante den esaki ya cu e departamento ta bin bati alarma pa escasez di trahadonan na unda awor cinco trahado so ta traha den orario di anochi y awor cu esnan cu a ser manda cas ta resulta un otro preocupacion.
