Segun resumen diario di Departamento di Salubridad Publico (DVG) riba desaroyonan di pandemia di Covid-19 na Aruba, actualmente tin tres persona den ICU na hospital di Aruba, y otro seis na Colombia.
Ademas, DVG a informa cu tin 34 persona mas cu ta hospitalisa riba piso general na Hospital Dr. Horacio Oduber na Aruba.
Segun resumen di ayera, 220 persona a recupera mientras cu a registra un total di 116 caso nobo di Covid-19, e malesa causa pa e virus SARS-CoV-2, di cual 8 persona no ta residente di Aruba. E cifranan aki ta representa un tasa di positividad entre nos residentenan di 43 porciento.
E cantidad di casonan activo di Covid-19 ayera tabata 482, y e cantidad di fayecidonan relaciona cu Covid-19 ta 193, despues di a registra dos fayecido mas riba dialuna.
Datonan di DVG ta ilustra casonan nobo di Covid cu un averahe semanal di 169 caso pa dia y un averahe di tasa di positividad semanal di 53 porciento pa dia.
