Ayera nochi a tuma luga Debate Democracia Aruba 2017 na Cas di Cultura sin presencia di representante di tres partido: AVP, CURPA y RAIZ. A pesar cu representantenan di RAIZ a presenta na Cas di Cultura, nan a abstene di participa den e debate. Te ainda no ta conoci e motibo pakico pasobra nan a wordo invita, segun e organisadonan.
E debate aki a wordo organisa pa e comunidad Latino. Sinembargo den e publico tabatin mas hendenan local cu hendenan di afo. E organisadonan a pidi pa e representantenan di cada partido por expresa nan mes na Spaño. Ricardo Croes di RED a haci su introduccion na Spaño, pero despues el a dirigi su mes na Papiamento hunto cu Candelario Boshi Wever di UPP.
Asunto relaciona cu debe publico, criminalidad, problema social, economia, infrastructura, lucha contra corupcion y prioridad di e gobierno actual a wordo trata den e debate aki. Tambe e aspectonan di ley di LTU, integracion, cultura y tradicion. Tin biaha e comportacion di e publico tabata emociona, y moderado Wilmer Aristizabal mester hala nan atencion bisando cu nan ta aplica e codigo di silencio. Kiermen solamente batimento di man.
Sinembargo, compara cu e ultimo debate organisa pa KvK no tabatin mucho problema cu e publico.
Candelario Booshi Wever a presenta su punto di bista pa ehecuta e Modelo Suiso atrobe.
E modelo aki ta encera cu personanan cu ta bin Aruba pa traha por haya estadia pa maximo 3 aña. Sr. Wever a argumenta cu e modelo aki lo trece mas cupo di trabou pa yiu di tera.
Di parti di POR, Jairo Boekhoudt a expresa cu ‘POR ta contra e modelo aki pasobra no ta humano pa exigi cu personanan cu a cuminsa traha un bida akinan bay bek nan pais despues di 3 aña’.
Den nos siguiente edicion nos lo trece un relato mas extenso di e debate.
