Fiscal federal a anuncia acusacion ayera contra tres homber acusa di menasa y intimida muhenan kende a acusa e cantante R&B, R. Kelly, di abuso, incluyendo un homber sospecha di cende un vehiculo na candela na Florida.

Un amigo di hopi tempo di Kelly a ofrece pa paga un victima $500mil pa stop e di coopera cu enhuiciamento di Kelly, segun autoridadnan, mientras manager y consehero di Kelly a menasa di revela potretnan sexualmente explicito di un muhe cu a demanda Kelly.

E musico ganador di premio Grammy a declara inocencia den decenas di cargo estatal y federal di mal conducta sexual na Illinois, Minnesota y New York. E cargonan ta varia di abuso sexual na maneha un schema di crimen organisa cu meta di suministra Kelly cu muhenan. Kelly tambe ta acusa di tin relacion sexual sin proteccion cu un menor di edad na 2015, sin revela cu e tin herpes.

Fiscalnan a describi un tercer homber acusa di intimida testigonan como relaciona cu ex-publicista di Kelly. Nan a bisa cu Michael Williams di 37 aña di edad, di Valdosta, Georgia a biaha na Florida na juni pa cende un SUV na candela pafo di un residencia unda un victima di Kelly tabata kedando. Ademas Williams a haci un buskeda riba internet pa ‘propiedadnan di detonacion di fertilisante y diesel fuel’, ‘intimidacion di testigo’ y ‘paisnan cu no tin extradicion cu Merca, segun autoridadnan.

“E hombernan acusa awe supuestamente a mustra cu no tin linea cu nan no lo crusa pa yuda Kelli evita e consecuencianan di su supuesto crimennan – hasta si esey ta nifica re-victimisa su acusadornan”, Peter Fitzhugh, un agente special a cargo di investigacion di siguridad nacional na New York, a bisa den un declaracion.

Tambe a acusa dos homber cu lasonan cu Kelly. Su amigo pa hopi tempo, Richard Arline Jr. di 31 aña ta acusa di ofrece di paga un muhe cu e tabata kere tabatin ‘demasiado’ informacion incriminador contra Kelly.

Autoridadnan a bisa cu nan a set up un wiretap y a graba un yamada den cual Arline a bisa cu el a papia cu Kelly den prison durante un yamada di tres persona.

Donnell Russell, di 45 aña di edad di Chicago, ta acusa cu acoso di un victima di Kelly y su mama despues cu e muhe no identifica a demanda Kelly. Autoridadnan ta bisa cu Russel, un manager y consehero di Kelly, a manda un carta na abogado di e muhe cu potretnan corta di dje, y despues a mand’e un texto advertiendo pa hala atras ‘of bo lo ser exponi’.