Dialuna atardi a keda deteni ex-secretario di bienestar social Carlos Rodas, ex-subsecretario di bienestar social Anahi Keller y ex-director di Hogar Seguro Virgen de Asuncion, Santos Torres, asina Ministerio Publico di Guatemala a informa den un comunicado.
E detencion a tuma lugar despues cu presidente di Guatemala Jimmy Morales a destitui tur linea di mando di e secretaria cu ta encarga di tur hogar di refugio pa mucha desampara na Guatemala, den cual tabata inclui e 3 persona cu a keda deteni tambe. E detencion a tuma lugar como resultado di tur investigacion di banda di fiscalia riba e incendio cu a presenta diaranson ultimo na e institucion Hogar Seguro Virgen de Asuncion, situa 10 kilometro na este di capital, y cu a laga 40 mucha morto.
Siete mucha ta como sobreviviente ainda den hospital den condicion critico y cinco di nan a ser hiba pa un hospital na Texas, Merca, pa asina por haya un miho tratamento. Morales a bisa cu a pidi ayudo na oficina federal di investigacion (FBI) di Merca y otro institucion internacional pa investiga e tragedia cu a marca tristesa y dolor na Guatemala Nan ta sospecha cu mucha por tabata bao sedante na momento di incendio Instituto nacional di ciencia forense (Inacif) a analisa si ta existi resto di algun medicamento o droga cu por a usa pa pone muchanan drumi, cu a muri den e incendio na Hogar Seguro Virgen de Asuncion diaranson cu a pasa.
Dilanti Comision di gobernacion di Congreso director Nery Cabrera di Inacif a splica cu nan ta busca resto di algun sedante, droga of toxico den e cadavernan. Nan ta investiga tambe si e muchanan a bin den contacto cu algun acelerador di combustion, pa por tin un situacion di tal grado, pasobra mayoria di nan tabatin kemadura di entre 75 y 90% di nan curpa.
