ORANJESTAD – Ayera a inicia cu e prome dia di Unesco su Media Development Program na Universidad di Aruba. E ‘Media Pressure Cooker Marathon’ ta un evento di tres dia unda a invita periodistanan, expertonan den media y hobennan talentoso pa haci un analisis riba e tereno di media na Aruba. Despues di cuater siman di produccion, lo publica e resultadonan riba 15 di februari.
Den cuadro cu Unesco Aruba su programa di participacion pa 2016-2017, diferente instancia local a entrega un peticion pa subsidio pa ehecucion di nan proyecto. Unesco recientemente a entrega mas cu 136 mil florin na subsidio pa realisa cuater programa, cual un di nan ta basa riba e desaroyo di media na Aruba. Patrick Arens, Business Director na Universidad di Aruba ta bisa cu: “Na Universidad nos ta papia hopi tocante di e calidad di media y publicacion di noticia akinan na Aruba. Semper como Universidad nos kier pa e pueblo tin acceso na e diferente recursonan di noticia. Pa nos e ta hopi importante cu e calidad di periodismo akinan na Aruba bay riba un nivel mas halto.” E obhetivo di e proyecto aki ta pa educa y contribui na un producto cu lo amplia conocemento di periodismo, como tambe eleva sabiduria di publico tocante media na Aruba.
PROGRAMA INTENSIVO
E evento aki ta encera tres dia di sesion di trabou, transmision en bibo y training. Periodista conoci na Hulanda Jeroen Pauw ta un di e lectornan cu a habri ayera e prome dia cu discusionnan interesante riba diferente obstaculo y puntonan di enfoke. Otro invitadonan y expertonan cu lo ta guiando e evento aki ta Dick Drayer, Yves Cooper, Favell Maduro, Renske Pin & Birgit Kreykenbohm. E participantenan mester traha den grupo riba diferente estadistica y puntonan di enfoke pa locual ta media y periodismo. A base di e analisis aki riba e tereno di media na Aruba, lo publica un long-read multimedial tocante e tema di periodismo.
CALIDAD DI NOTICIA
Varios punto a bini pa dilanti durante e prome discusionnan entre otro: calidad di noticia, transparencia y obstaculonan den prensa. Sr. Arens – kende tambe ta participando – ta splica Bon Dia Aruba cu: “Aworaki tin sinembargo un cantidad di corant y media cu hende sa cu nan ta un tiki conecta cu diferente partido politico. Pa mi ta hopi importante cu e periodistanan eherce nan trabou debidamente anto no djis replica locual nan a scucha na un rueda di prensa of comunicado di prensa cu nan a haya. Ta importante pa bay mas leu y evalua kico ta tras di e noticia. P’esey Unesco su indicadornan ta hopi importante pa hende conoce kico ta berdadero ehecucion di noticia.”
Sr. Maduro ta conta Bon Dia Aruba cu na 2014 a cuminsa cu e programa aki na Corsou cual a duna hopi bon resultado. Sr. Maduro ta un di e top periodistanan na Corsou kende lo ta dunando training riba e parti di con pa haci bo noticia visualmente atractivo. “Nos manera periodista tin cu sostene otro, nos tin cu lanta pa otro. P’esey ta bon pa nos bin hunto den e manera aki anto discuti kico ta periodismo y mehora e calidad. Door di cuestiona bo mes, bo ta crece y bira mas miho den bo trabou.”
