Tres detencion plantacion marihuana

Tres persona a keda deteni na un cas na Sabana Liber pa motibo di un plantacion di marihuana. E cas ta di e abogado Nilo Croes cu a huur su cas na e sospechosonan. 

 

Te awor polis no a duna mucho informacion entre otro si e doño tabata na haltura di e plantacion. Segun e relato di polis nan a pidi e doño di cas si por drenta paden pa haci un “huiszoeking” como cu ta sospecha cu tin un operacion ilegal di droga den e vivienda. “E doño di cas a nenga e peticion di polis, locual a pone cu a pidi mesora pa presencia di un fiscal Auxiliar pa por aproba pa drenta paden. Polisnan maritimo a core yega na e sitio tambe pa duna un man den e accion relampago cu a duna bon resultado”, asina e relato ta conta. 

Esaki ta e otro informacion for di e comunicado cu polis a manda pa prensa:

“Manera ley ta prescribi den casonan di droga asina, teniendo cuenta cu aki no ta trata di un sigaria di marihuana, sino cultivo profesional di marihuana pa benta “por mayor”, cu a opta pa confisca  2 auto , mientras cu a traha un “ontnemingsrapportage” den cual hues lo mester dicidi kico mas ta kita di e sospechoso. E ley aki ta aplicabel na momento cu polis descubri un plantacion y cultivo profesional di marihuana, unda ta conta e balor, e gastonan pa cultiv’e, e ganashi cu lo a saca for di e benta ilegal, pa asina por fiha un multa cu sa bay mayoria bes confiscando auto of propiedadnan den.”