Centro di Operacion Maritimo (MOC) di Wardacosta Caribe Hulandes a alerta e barco patruyero tocante un boto sospechoso. Despues di e notificacion di MOC, Zr.Ms. Groningen a nabega bay e localidad di e boto sospechoso pa intersepta esaki. E avion patruyero Dash di Wardacosta tambe a keda dirigi na e localidad pa asisti e barco patruyero.
Una bes den bisindario e barco a lansa su dos botonan rapido di intersepshon, asina yama FRISC. Na momento cu e pasaheronan di e go-fast a nota e FRISC-nan, nan a purba huy y a cuminsa tira bultonan cu contrabanda den lama. Al final despues di un persiguishon cortico e sospechosonan a keda detene. Riba e go-fast tabatin seis sospechoso cu mas pakete cu droga.
Durante momento di caba di atende e prome accion, Zr.Ms. Groningen un biaha mas a keda notifica di un boto sospechoso. E biaha aki tambe e FRISC-nan a cuminsa cu persiguishon pa obliga e boto pa stop. E cuater pasaheronan di e boto aki a keda detene y hunto cu e paketenan, cu supuestamente tabata contene droga, a keda trece a bordo di Zr.Ms. Groningen.
Mas laat den dia a descubri un di tres go-fast cu tabata nabega cerca den bisindario di e barco patruyero Groningen. Un biaha mas a lansa e FRISC-nan pa sali bai investiga. A resulta cu e boto tabata un go-fast, cu tres pasahero cu tabatin supuestamente bultonan di contrabanda na bordo. A trece un total di 13 sospechoso y mas of menos 3700 kilo di contrabanda, di cua mita tabata cocaina y e otro mita di marihuana, na bordo di Zr.Ms. Groningen. Tur e sospechosonan mas e paketenan a keda entrega na autoridadnan na Corsou pa sigui investiga e casonan. E bultonan, despues di investigacion, a keda destrui.
