Durante un entrevista reciente cu Bon Dia Aruba a tene cu Consul General di Merca, Margy Bond, el a elabora ariba e diferente colaboracion, no solamente den e area di educacion, cu Consulado di Merca tin cu e islanan di Caribe Hulandes, specificamente cu Aruba.

Consul General Bond a enfatisa cu na Aruba, e area di educacion ta realmente un tema principal.

E consulado no solamente tin e intercambio educativo entre Penn State University y Universidad di Aruba, pa cual e tabata di bishita na Universidad di Aruba pa e recepcion pa celebra e prome programa di e estilo aki na Aruba, pero tin un variedad di otro intercambionan, diferente programa pa diferente hende den diferente fase di bida.

Un di e programanan cu no ta enfoca den e area di educacion solamente, pero den hobennan emprededor ta e programa yama Iniciativa di Lidernan Hoben di America, (YLI). El a splica cu esaki ta un programa cu ta existi desde aña 2015, pero desde aña 2016, Aruba y e otro islanan den Caribe Hulandes ta participa y actualmente tin cuater hoben for di Caribe Hulandes cu ta na Merca participando den e programa aki.

YLI ta un programa cu hobennan por aplica den luna di mei pa participa den dje. Tin den total cuater luga pa e region di Caribe y e programa ta stimula hobennan empresario, lidernan den sociedad, hobennan cu tin un iniciativa of un idea cu nan ta trata di construi cu lo beneficia e seguridad, prosperidad, bienestar economico di e hende di e isla cu nan aplica.

Consul General Bond a sigui splica cu despues di e proceso di aplicacion tin un proceso di entrevista y despues nan ta haci e seleccion di e hobennan cu lo biaha pa Merca y nan ta keda seis siman na Merca, na diferente ciudad. E meta ta cu despues di e seis siman aki e hobennan ta bolbe y nan ta pone den practica tur e conocemento nobo.

“Nan tambe ta parti di un red, e red di YLI, cu ta cubri henter Hemisferio Oeste, incluyendo Canada y ta un red grandi. Awor tin 280 hende den e programa aki e aña aki. Asina bo por pensa 280 biaha cuanto hende a bay desde 2015. Ta un red grandi,” el a resalta.

E aña aki tin tres hende muhe di Aruba cu ta den e programa y un hende homber di Corsou. E programa ta cuminsa na Houston na unda tur e nominadonan for di henter e hemisferio ta reuni y despues nan ta continua pa nan luga di trabao den e ciudad cu nan a keda asigna. Na final tur ta bolbe Washington pa conta tocante nan experiencia.

Pa loke ta e rekisitonan pa por aplica pa participa den e programa YLI, e persona cu kier aplica mester tin un negoshi. E no mester ta un negoshi necesariamente pa ganashi, e por ta un organisacion sin fin di ganashi of un negoshi social, pero e mester ta un negoshi oficial.

E negoshi mester tin un historial di crecemento y mehoracion den e ultimo dos aña, e doño di e negoshi mester tin entre 25 y 35 aña y evidentemente mester ta cla pa laga tur cos atras y biaha pa seis siman. Tambe e persona mester por papia Ingles bon, pues e programa ta na Ingles.

El a enfatisa cu e proceso ta hopi competitivo pasobra tin solamente cuater luga pa e region y ta e miho cuater aplicantenan for di e aña ta ser seleccion y nan ta bay. El a agrega cu esnan cu aplica y no keda selecciona no kiermen cu nan no por aplica di nobo. Cualkier persona, entre 25 y 35 aña, por sigui splica te ora cu nan logra keda selecciona.

Otro iniciativa cu Consul General Bond a menciona cu e Consulado Mericano tin na tur e islanan y cu tambe ta cuminsando di nobo aki na Aruba, ta e Programa Internacional di Liderazgo Boluntario (IVLP), cual ta un otro tipo di oportunidad pa biaha pa Merca pa forma parti di discusionnan cu expertonan y topa cu hopi hende cu ta traha den e mesun tereno y tambe hende for di otro paisnan. “E ta un programa hopi prestigioso,” el a resalta.

El a splica cu e consulado mes a nomina un miembro di ministerio di Agricultura di Aruba, sr. Facundo Franci, cu ta planeando pa biaha pa Merca y participa den e programa di tres siman pa topa cu otro expertonan den e tereno pa siña mas tocante e retonan di clima, practicanan sostenibel den agricultura, y con Aruba por ta comparti experencianan cu otro tocante e problema di algun di e retonan di seguridad di alimento y cambio di clima.

Otro punto cu el a trece pa dilanti ta e tema di energia limpi, cambio di clima, con pa trata resiliencia y e crisis di clima.

“Esakinan tambe ta area di prioridad pa nos y e manera cu nos ta trata esaki ta a traves di algun di e tipo di intercambionan aki, a traves di e IVLP, a traves di trata di promove negoshinan Mericano. Ora tin un propuesta of un oferta pa trabou den un sector renobable, nos ta desea pa negoshinan Mericano haya un oportunidad pa pone un bid riba e proyectonan ey. Esaki ta algun di e otro cosnan cu ta nos prioridad,” el a remarca.

Potretnan ta di Facebook.