Di acuerdo cu e mas reciente pronostico di e ‘Indice di Miseria’ (Misery index) di Bloomberg, Venezuela ta figura na e prome luga di e lista na 2017 tambe.
E pais bisiña ta aparece pa di tres aña consecutivo como lider den e dudoso lista di pais cu e economia cu eperspectiva mas miserabel. E medicion haci pa Bloomberg ta contempla e situacion encuanto inflacion y desempleo como indicador di e situacion economico.
“E prijsnan di petroleo decepcionante, e unico exportacion significativo di e pais, a alimenta un crisis cu a laga e shelfnan di e tiendanan bashi, hospitalnan sin medicamento basico y crimen violento, mientras cu desesperacion ta conduci na rabia”, segun e informe di Bloomberg. Mientras cu e pais no a reporta dato economico desde 2015, Bloomberg tin su “Cafe Con Leche Index” cu ta trata di sigui pista di inflacion via e costo di un copi di koffie, cu ta mustra un explosion di prijs di 1419% desde mita di augustus (2016). Prijsnan lo sigui subi e aña aki segun Bloomberg cu un aumento di seis biaha loke e ta actualmente. Entre e demas paisnan cu ta den e lista, cu no ta ni yega cerca di e gravedad di Venezuela, tin Sur Africa, Argentina, Grecia, Turquía, Spaña, Ucrania, Serbia, Brasil y Uruguay, den e top 10 di e ranking. Venezuela ta score un increibel 499.7 riba e Index, mientras cu esun mas cerca, Sur Africa, ta na apenas 32.2.
