Na 2021 e actual hefe di polis di Korps Politie Aruba (KPA), Ramon Arnhem, a asumi su cargo pa asina reemplasa e hefe di polis e tempo ey, Vanessa Tjon Kock, na momento cu su casa, Rocco Tjon, a asumi su cargo como Minister di Husticia. Aworaki tres aña despues cu el a tuma over e responsabilidad como hefe maximo di Cuerpo Policial, Arnhem ta señala cu tres aña ta poco tempo pa termina cu su trabao como korpschef.
Segun e portal local, Noticia Cla ta indica, Arnhem a admiti cu mirando e trabao cu tin, tres aña ta poco tempo pa realisa e trabaonan aki te ora cu su contract vence.
Manera ya caba menciona, Arnhem a reemplasa hefe di polis e tempo ey, Vanessa Tjon Kock, na momento cu su casa Rocco Tjon a bira minister di husticia na 2021. Segun e relato den Noticia Cla ta indica, tin rumornan persistente cu ta señala cu Arnhem ta ocupa e posicion di hefe di polis mientras cu Tjon ocupa su puesto como Minister. E rumornan aki no a keda confirma pa e portal local.
Segun Arnhem a indica, aunke tres aña ta un tempo cortico, nan lo percura pa tin por lo menos un movecion den e plannan pendiente.
E korpschef a admiti na Noticia Cla cu ora cu e la tuma e trabao, e no tabatin idea di kico pa spera y despues di asumi su cargo, el haci un investigacion interno pa asina e por sa kico ta loke mester haci.
A pesar di e tempo cortico, Arnhem a sigura cu el “lo haci lo mihor cu por”.
Pa loke ta su prioridadnan, Arnhem a splica cu e prioridad number uno ta pone e esencia di liderazgo di e hendenan. “Cu e ciudadano haya e confiansa atrobe, cu e ciudadano haya un perspectiva, sinti su mes sigur, y cu e ta sinti su mes bon” Arnhem a bisa na Noticia Cla.
El a expresa cu e ta sinti bon di ta na Aruba y lo desea mas tempo pa asina e por termina su trabao.
