Un trein di carga di un empresa minero a ser kima na su paso pa e ciudad Chileno di Antofagasta pa un grupo di personanan cu cara tapa, den marco di e protestanan cu e pais ta biba desde 18 di october di aña pasa, fuentenan di bombero a informa ayera diamars.
E incidente a tuma luga dialuna den oranan di anochi na interseccion di e dos caya principal di e ciudad, 21 de mayo cu Andres Sabella, unda e linea ferroviario ta dividi e ciudad entre poniente y oriente y luga habitual di reunion di algun persona prome cu cuminsa e manifestacionnan, segun un fuente di bombero a relata.
Den e ocasion aki, algun di e personanan a lansa bomba molotov contra e trein cu tabata pasa pa e luga, ademas di piedranan.
E tripulacion a bandona e trein den pleno caminda, loke a laga dos persona herida aunke no di gravedad.
E trein a sigui cu e candela durante mas un di un kilometer, sin e hende cu ta maneha e mashinnan; despues a logra controla y paga e candela, un operativo cu e bomberonan a cualifica como ‘compleho’.
E mashin cu a ser destrui ta pertenece pa e empresa di transporte Fcab, cu a traves di un comunicado a señala cu esaki ta di dos atake di e sorto aki cu nan ta sufri den menos di 30 dia.
Aunke e manifestacionnan a perde forsa, e mal contento ta sigui riba e cayanan y e crisis ta parce cu ta leu di un solucion, aunke a anuncia algun medida di parti gobierno y e acuerdo parlamentario pa convoca un referendum riba un Constitucion nobo.
