E proyecto conoci como “Trayecto Siña Traha” a logra sobrevivi pa a lo menos un aña mas, despues di un periodo di incertidumbre riba si e ta bay sigui si of no.
“Trayecto Siña Traha” no tabata riba nivel ainda y esaki tabata un strobamento pa sigui cu ne. Sinembargo e minister di Enseñansa cu a kere den e balor di e proyecto aki a bin cu solucion pa e “Trayecto Siña Traha” no muri; y cu e ta keda uno aceptabel y reconoci tanto na Aruba como na Hulanda.
A lo menos e proyecto aki cu ta cay bou di Fundacion Reclassering ta cla pa sigui un aña mas. Inicialmente for di 2011 nan a haya financiamento di Hulanda pa realisa e proyecto aki pa medio di CEDE Aruba. Aworaki nan ta den nan di tres aña y despues Gobierno ta supone cu ta tum’e over. E parti di enseñansa ta un aña pa un aña y mey, pero den cada modulo e hoben ta haya un certificado y door di acumula e diferente certificadonan, nan ta haya un diploma despues. E diploma aki ta reconoci tanto na Aruba como na Hulanda.
E proyecto aki ta encera un combinacion di diferente ministerio, tanto esun di Enseñansa como tambe ministerionan di Husticia y Labor. Aunke e tin di haber cu husticia, no mester lubida cu nan ta ofreciendo e hobennan aki un educacion, y sin sosten di ministerio di Enseñansa no por ehecuta e proyecto aki. Pero tin e parti cu e hobennan tin cu bay traha cu ta e parti laboral cu ta concerni na e ministerio di Labor.
Na 2011 fundacion Reclassering a bin cu e proyecto aki, cu a duna bon resultado, cu e meta di duna un segundo oportunidad na e hobennan cu a cay cera. Hecho ta cu mas cu 50% di e hobennan aki tabata drop out. Pa e fundacion aki tabata resulta dificil pa resocialisa nan y pa integra nan bek. Nan ta hobennan mayor di 17 aña cu no ta bayendo scol y cu no por bay scol regular bek pa nan edad, pero no por drenta mercado laboral tampoco pasobra nan no tin ningun diploma.
“Trayecto Siña Traha” 2017
Directora di Reclassering, Seraida Pemberton a declara na Bon Dia Aruba cu a bin cu un palabracion cu Ministerio di Enseñansa. “Trayecto Siña Traha” ta bay sigui y e ta bay cuminsa dia 9 di januari 2017. Sinembargo e ta haya di vital importancia pa tur departamento concerni traha hunto pa por realis’e, ya cu esaki ta e parti cu tin biaha ta bay mucho poco poco.
Ya caba nan a cuminsa cu e parti di preparacion di e hobennan cu ta bay drenta den e parti educacional. E biaha aki un grupo di 54 hoben a registra y ta atendiendo e diferente tayernan riba comunicacion, training, informacion riba come saludabel, prevencion di embaraso hubenil y diferente otro areanan cu ta hunga un rol den bida di e hobennan.
E concepto di e proyecto “Trayecto Siña Traha” a wordo modifica ya cu si nan ta cuminsa na januari awor, e hobennan interesa por sigui aplica pa asina haya chens den transcurso di e proyecto pa drenta tog. E proyecto inicialmente tabata destina pa e hobennan cu a cay cera, pero na 2014 nan a amplia esaki pa atende na un forma preventivo cu hobennan den riesgo. Nan ta hoben entre 16 pa 24 aña cu no a caba niun scol y no ta hayando trabou pasobra no tin papel.
Reclassering a tuma seis siman prome cu scol ta cuminsa pa duna e hobennan aki e informacion y preparacion rekeri pa nan haci escogencia corecto. Pero tambe pa wak nan motivacion pa atende e trayecto aki di siña pa traha. Tur dia nan tin cu bin for di mainta te atardi; y a base di esey nan ta wak con motiva nan ta y si nan ta mantene nan mes na structura di e lesnan y e tayernan aki. Despues nan ta bay scoge e hobennan cu lo sigui cu e “Trayecto Siña Traha” na januari awor.
Cursonan
Nan ta bay cuminsa cu cuater curso: Assistent pa Mantencion; Assistent pa Mecanico; Assistent pa Empleado Comercial y Assistent di Cuido. Nan a bin cu e delaster curso nobo, vooral pa participantenan femenino haya oportunidad riba e area ey. Nan por traha den un negoshi cu ta ofrece e servicio aki of nan mes por cuminsa nan negoshi chikito na cas unda nan por haci manicure of pedicure di un forma independiente. Ya cu tin biaha e mucha muhe tin yiu cu ta haci dificil pa nan por sali bay traha.
Reclassering ta sinti cu e hobennan aki por haci e cursonan aki ariba nan mes ora cu nan ta bin cla. Ya cu nan ta ripara cu despues cu particularmente e grupo aki ta bin cla cu nan estudio, no tur biaha ta facil pa nan por haya trabou. Mirando e combinacion aki, Reclassering pa medio di e proyecto aki ta purba pa e hobennan aki por haya un enseñansa y experiencia di trabou pa ora nan ta bin cla, nan lo por bira mas stabiel.
