Trayecto di Formacion Social (Sociaal Vormings Traject-SVT) di Aruba y Corsou hunto a finalisa nan fase militar na Corsou. E dianan cu ta tras di lomba tabata den e enfoke di actividadnan intensivo, cu cursistanan y nan supervisornan a pasa cu exito.
Riba Dialuna 27 di November a tuma luga e crusada amfibico, sigui pa subimento di e tres seronan (Veerisberg, Jack Evertzberg y Seru Pretu) riba Diamars. Ademas e cursistanan a completa e prueba di landamento di cuater dia, den piscina na Parera. E actividadnan varia aki no solamente ta forma un experiencia di aprendisahe pa e cursistanan, pero ta brinda tambe momentonan di siñansa valioso pa e miembronan ehecutivo y e instructornan cu ta involucra den e trayecto aki.
Ta di prome biaha desde establecimento di e Trayecto na 2011, cu ambos Trayecto di Formacion Social di e dos paisnan ta reuni hunto. Durante e Trayecto caracteristicanan manera disciplina, perseverancia, respet personal, structura y responsabilidad ta para central. Defensa ta encarga cu e fase militar hunto cu Fundacion Proyecto ‘Un Comienso Nobo’.
Riba Diahuebs 30 di November e cursistanan ta keda ricibi cu aplauso di entrada na Fort Amsterdam, cu cua nan a finalisa e fase militar y ta sigui pa e trayecto di siñansa y labor.
